Ilinniartitsisut kalaallit Narsap Atuarfiani atorfeqarnissaat piviusunngortoq

Narsap Atuarfiani atuartut siornatigut sungiusimasaminnit allaanerulluinnartumik aggustip qulinganni misigisaqarput.

Atuarfimmi ilinniartitsisut 28-t tamarmik atorfinitsitaasut kalaaliupput. Tamannalu ukiut qulit matuma siorna allaanerulluinnarpoq.

- Tulluusimaarutigeqaara, Kattie Egede Motzfeldt Narsap Atuarfiani pisortaq oqarpoq:

- Aamma ilinniartitsisut ilinniarsimasuulluarlutillu piginnaasaqarluartuunerat immikkut malugiuaannarakku. Taamatut suleqateqarsinnaaneq tunissutaavoq – qujamasunnarujussuarpoq. 

Narsap Atuarfiani atuartut 1. klassemiit 10. klasse ilanngullugu 166-iupput. 

Atuartunut pingaaruteqartoq 

Ilinniartitsisussaaleqineq Narsap atuarfiani ukiuni qulini kingullerni ajornartorsiutaavoq.

Narsap atuarfianili pisortaq Kattie Egede Motzfeldt oqaluttuarpoq, ilinniartitsisut Narsamut ukiuni kingullerni nooqqittarnerat pissutigalugu, ilinniartitsisutut ilinniagallit maanna amerlanerulersimasut.

Kattie Egede Motzfeldtillu oqarnera naapertorlugu, tamanna atuartunut iluaqutaassaaq.

- Ukiumut pilersaarusioqqeqqissaartarpugut ukiup ingerlanerani anguniagassat ersarissut suliaralugit. Taamaammat angajoqqaat suleqatigalugit atuartullu pitsaasumik angusaqarnissaannut siunertalimmik ingerlatsinerput pinngitsoornani atuartunut pitsaasumik kinguneqassooq, taanna oqarpoq nangillunilu:

- Maannakkut ilinniartitsisugissaarnitta atuartut ukiuni tulliuttuni angusaaleraluttuinnarnissaannik kinguneqarumaarnera qularinngilara.

Siornatigut erloqinartoqangaarsimasoq

Narsami 2021-mi ilinniartitsisussaaleqisoqarnera ima ilungersunartigaaq, angajoqqaat arlallit akerliussutsimik takutitsinissaminnik eqqarsaateqaleraluarlutik.

6. klassimi atuartut tamarmik qaammatit marluk ingerlanerini nalunaaquttap-akunnerini 70-ini atuarsimannginnerat naatsorsuillutik paasivaat.

- Ajoq. Ukiut tallimat Nuummiikkatta tamakku aqqusaannginnatsigit. Taava maanga pilluni tupannaasalluni. Eqqarsarnartarluni Narsamiilluni atuartuuteqarluni ajoq. Aallaannapajussinnaanatalu, Birgitte Rothaús Johnsen panimminik klassemi atuartuuteqarsimasoq KNR-imut taamani oqaluttuarpoq.

Narsamili pissutsit maanna allanngortinneqarsimapput.

- Tullinnguullugu atuagarsornermik paasinninneq, qallunaatut pædagogisk indblikimik taasagaat, atuarfitsinni nukittorsarusullugu suliniuteqarpunga, Kattie Egede Motzfeldt tusagassiuutinut nalunaarummi oqarpoq.