Ikuallattumik paasiniaaneq: Misissuisartut Ukkusissanut aqagu tikissasut

Pinerluttoqarsimasinnaaneranut misissuisartut Danmarkimeersut, nunaqarfimmi Ukkusissani tallimanngornermi ullaakkut ikuallattup misissuiffiginissaanut ikiuutissallutik tikissapput.
Misissuisartut illumut nunaqarfimmi tallimanngornermi ullaakkut ikuallattumut paasiniaanermi ikiuutissapput. Assi © : Juuli J. Frederiksen
Allattoq Nutaarsiassaqartitsivik / Nyhedsredaktionen
juunip 22-at 2021 11:40

Pinerluttoqarsimasinnaaneranik misissuisartut nakorsarlu toqusunik misissuisartoq Danmarkimiit Ukkusissanut pingasunngornermi tikissapput. Taakkua illumut nunaqarfimmi tallimanngornermi ullaakkut ikuallattumut paasiniaanermi ikiuutissapput.

Kalaallit Nunaanni politiit pigaartuini pisortap, Preben Kleistip KNR-mut tamanna uppernarsarpaa.

Politiit tallimanngornermi nalunaarput, ikuallattoqarnerani minnerpaamik inuk ataaseq ajunaartoq.

Inuillu allat marluk ajunaarsimassasorineqartut arfininngornermi nalunaarput.

Politiilli ajunaarsimassangatitsinertik misissuisoqaqqaartinnagu uppernarsarusunngilaat.

AAMMA ATUARUK Ukkusissani illup ikuallannerani marluk allat ajunaarsimanissaat ilimagineqartoq

Ikuallannermi taassuma saniatigut inuit pingasut ajoquserput. Taakkualu tamarmik Nuummut Dronning Ingridip Napparsimmavissuanukaanneqarput.

Ikuallattoqarneranut misissuisartut ikuallannermut pissutaasoq Ukkusissanut aqagu tikikkunik ilaatigut paasiniassavaat.

Kalaallit Nunaanni Politiit pigaartuat, Preben Kleist, politiit suliamut misissuinerat pillugu allanik oqaaseqarusunngilaq. Uummannami upalungaarsimaniarnermut inspektøri, Isak Pjetturson, aamma oqaaseqarusunngilaq politiinullu innersuussilluni.

Ukkusissat 150-it missaannik inoqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk