Kalaallit Illuutaat oqalutsinik ajornartorsiuteqartut

Danmarkimi naalagaaffiup kukkunersiuisuisa nalunaarusiaat kingulleq naapertorlugu kalaallit qallunaallu oqartussaasuisa akornanni nutserussisarneq ajorpallaarpoq.

Pissutsit taamaanneri Aarhusimi Kalaallit Illuani pisortap Jørn Holbechip ilisarisinnaalluarpai sualummik kalaallit innuttaasut qallunaallu oqartussaasuisa akornanni nutserissussisarneq eqqarsaatigalugu.

- Nutserissussisartut pitsaassusaata nikerarnerujussua malugisarparput. Ilai nutserillaqqilluinnartarput, ilaasali oqaatsit arlaannaalluunniit pikkoriffigivallaarneq ajorlugu.

Nutserisartut pitsaassusaata nikerarnerujussua Aalborgimi Odensemilu kalaallit illuini aamma malugineqartarpoq. Assersuutigalugu ataatsimiittoqartillugu Kalaallit Illuini inunnik isumaginninnermik sullissisartut kalaallisut qallunaatullu oqalussinnaasut amerlasuutigut sullitatik ikioraangamikkit nutserisussaqarneq ajornera misigigajuttarpaat imaluunniit nutserisuuniaq pikkorluttoq atorneqartarluni.

Danmarkimi Politiit, Eqqartuussiviit Napparsimmaviillu nutserisut akuerisat periarfissaraat, Inatsisinimmi atuutsitsinermut ministeriaqarfiup allattorsimasuutigimmagit, allattukkallu atorlugit nutserisussaq oqarasuaatikkut attaveqarfigineqarsinnaalluni.

AAMMA ATUARUK Danmarkimi oqalutsit kalaallit amigaataasut

Naak Aarhusimi Kalaallit Illuat nutserisoqanngikkaluartoq akuttunngitsunik oqartussaniit attaveqarfigitittarpoq nutserissutsinnissaminnillu ikioqqusarlutik.

- Ilaannikkummi oqartussaasut saaffigisarpaatigut ikioqqullutillu, uagummi pitsaanerusumik nutserissussisinnaanerput ilaatigut nutserinermik sullissiviit neqeroorutigisinnaasaanniit pitsaanerusartoq ilisimareertarpaat, tamannalu ajornartorsiutaavoq, Jørn Holbech oqarpoq.

Ilaannikkummi sulisut marluinnik oqaatsillit nutserisutut atorneqalertarput, tassa sullissisuusup kalaaleq pineqartup sullinneqarnerata saniatigut nutserisuusarlutik.

AAMMA ATUARUK Peqatigiiffik Aalborgimi kulturimik nutserisortaarusuttoq

Inunnimmi siunnersuisup sullinniakkami saniatigu nutserisutut atorneqartarnera pitsaanngilaq, Jørn Holbechip nassuerutigaa, tamannali allatut ajornarsinnaasarluni.

- Innuttaasormi kalaaliusoq ikiortussaavarput. Nutserisuunerli sullissisuunerlu assigiinngissinnaasaqaat, sullissileraangattali ingerlaannaq apeqqut una takkuttarpoq: Innuttaasoq una qallunaatut oqaluunneqarnini paasisinnaanerlugu? Innuttaasorlumi qallunaatut oqalussinnaanngikkaangat taava uagut sullitatta oqaatsit anninneqartut ilumut paasinerai qulakkeerniartarlutigit, Jørn Holbech oqarpoq.

Kalaallit Danmarkimut nuussimasut nutserisussamik pisariaqartitsisarnerat annertusiartuinnartoq siusinnerusukkull paasinarsereerpoq.