Efterskoli nutarterneqassaaq, pisortaq isumaqarpoq. Kisianni qaquguussanersoq ilisimaneqanngilaq

- Tupaallaamminaraluarluni ilumoorpoq. Taamaattumik aalajangiineq saneqqunneqarsinnaanngilaq.

Maniitsumi Efterskolip pisortaa Vilhelm Lars Josefsen taama oqarpoq.

Ataasinngormat kingullermik Maniitsumi efterskoli atuartuerutitinneqarpoq atuarfiup illutai oqoqartut paasineqarmat.

Vilhelm Lars Josefsen nassuiaavoq 2012-imiilli kollegiap illutaata efterskolimi atuartunit najugarineqartup oqoqarnera pasineqalermat.

- Suleqatitta, atuartuutitta angajoqqallu ataasiakkaat akornanni, pingaartumik eksemeqartuni, arlaanni oqoqartoq sivisuumik pasisimavarput, KNR-imut oqarpoq.

Taamaattumik efterskoli nammineerluni atuarfiup illutaata iluani silaannarmik misissuisitsivoq. Kingornatigullu nalunaarusiami naammassisami inerniliineq kusanarpallaanngilaq.

Tassani allassimavoq atuarfiup illutaani arlalitsigut siornatigut imermit ajoqusersimasoqartoq oqummik tipimillu kinguneqartunik.

Oqoqarnerta kingunerisaanik atuartut Majoriap kollegiartaanut inissinneqarput Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik qaammammi matumani siusinnerusukkut tusagassiuutinut nalunaarummi allappoq.

Maniitsumi efterskoli atuartunut 60-inut inissaqarpoq. Ukiumi atuarfiusumi matumani 28-upput.Assi © : KNR Assi © : KNR

Atuarfiup qimanneqarnerata misilitsinnerup ingerlaleruttornera nalerorpaa. Tusagassiuut inut nalunaarut naapertorlugu atuartut sulisullu peqqissusiat pillugu tamanna pisariaqarpoq.

Pisortaq Vilhelm Lars Josefsen KNR-imut nassuiaavoq, atuarfimmi atuartut 28-usut allattarissamik misilitsinnerit naammassigaat. Oqulli peqqutigalugu atuartut 11 ilaquttaminnut angerlartariaqarsimapput. 

- Naatsorsuutigaarput amerlanerulissasut, atuaqataat angerlareermata, oqarpoq.

Efterskoli ingerlaqqissaaq 

Maniitsumi Efterskoli Namminersorlutik Oqartussat ataanniippoq, taamalu naalakkersuisut aalajngiissapput efterskolip, atuartuisa sulisullu qanoq pineqarnissaannik.

Tusagassiuutinut nalunaarummi nassuiaapput Maniitsumi Efterskolip “massakkuugallartoq” “nalinginnaasumik ingerlanneqarnera” ajornartoq. 

- Aammalu qimanneqarallarnerata kingunerissavai ukiup atuarfiusup matuma aappaagumullu ukiup atuarfiusussap atuarfiup sunik pisoqarnissaanik pilersaarutaasa annertuumik allanngortinneqarnerat, allassimavoq.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoq Aqqaluaq B. Egede (IA) KNR-imut oqarpoq:

- Naalakkersuisoqarfimmi aaqqiisoqarnissaanik suliaqarneq aallartipparput atuartut sapinngisamik annikitsumik eqqorneqarnissaat qulakkeerniarlugu, oqarpoq.

Nassuiaavoq ilaatigut misissuisoqalersoq atuartunut nutaamik kollegialiortoqassanersoq.

Illut nutartertariaqarput

Efterskolimi pisortaa naapertorlugu atuartut najugaqarfigalugit inaasa nutarterneqarnissaat pisariaqarpoq. Aamma sulisut najornerusartagaat aamma init allat marluk taamaaliorneqarnissaat pisariaqarpoq, atuarfik pisarnermisut ingerlaqqissappat.

- Illut ilaat ajornerpaat nutarterneqarsinnaappata atuarfiup ingerlanneqarnera nangissinnaavoq, Vilhelm Lars Josefsen oqarpoq.

Oqaluttuarpoq atuartut pilersaarut naapertorlugit aappaagu efterskolimi aallartittussat aallartinnissaminnik nalunaarfigineqareersimasut.

Naalakkersuisup Aqqaluaq B. Egedep (IA) aamma erseqqissarpaa anguniarneqartoq efterskolimi aturtinneqarneq pilersaariutaasutut aggustimi aallartissasoq.

- Sukumiinerusumik akissuteqarsinnanngikkaluarlunga oqassaanga naalakkersuisoqarfiup ajornartorsisut tuaviuussatut ingerlakkaa, oqarpoq.