Maniitsumi efterskoli oquk pissutigalugu inuerutinneqassasoq

Maniitsumi Efterskolimi atuartunut ukioq atuarfiusussaq naatsorsuutigineqartutulli issagunanngilaq.

Maniitsumimi efterskolimut ukiup aappaa avillugu tulliuttoq ajortussaarpasippoq.

Oquttoqarnerami pissutigalugu atuartut efterskolimit ataasinngorpaatinngu nuutsinneqareersimassapput. Taakku Majoriap atuartunut ineqarfiutaanut nuutsinneqassapput.

Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik tusagassiuutinut nalunaarummi allappoq.

- Atuartut sulisullu peqqissuunissaat eqqarsaatigalugu 2. maj 2024-mi Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik siulersuisunut siulittaasumut Maniitsumi Efterskolimi forstanderimullu piumasaqarpoq ilinniartut ineqarfiat aamma atuarfiimmi init ataasiakkaat piaarnerpaamik inuerutsinneqassasut, tassani allassimavoq.

Maniitsumi Efterskoli piffissami matumani “nalinginnaasumik ingerlatsisoqarnissaa” periarfissaanngikkallartoq naalakkersuisoqarfik ilanngullugu allappoq.

- Inuerutsitsinerup ukiumi matumani ukiunilu aggersuni efterskolimi sammisassanik pilersaarusiornermi annertuumik taamaasilluni allanngortitsineq kingunerissavaa, naalakkersuisoqarfik allappoq.

Maniitsumi atuarfinni oquk, silaannaluk tipilu aatsaat siullermeertumik ajornartorsiutaanngillat.

Maniitsumi Atuarfik Kilaaseeraq erngup innarliinera oqunneralu qanoq ilungersuutigitiginerai KNR-imit siusinnerusukkut saqqummiunnikuuarput.

Atuarfik 2022-mili ajornartorsiuteqalerpoq, siornalu suli ajornartorsiutaalluni.

Tamanna Maniitsumi Efterskolimut maanna aamma eqquivoq.

Sivikinnerpaamik ukiut aappaa affaalu

Efterskolip illuutaanik atuartunik inuerutitsinissamut aalajangiineq efterskolip silaannaata misissorneranik tunngaveqartoq, Ilinniartitaanermut, Kultureqarnermut, Timersornermut Ilageeqarnermullu Naalakkersuisoqarfik allappoq.

Iluarsartuussinissamut aqutsisoqarfiup annertuumik iluarsartuussisoqartariaqartoq tamatuma kingorna inerniliissutigaa.

Maniitsumi Efterskoli sivikinnerpaamik ukiut aappaata affaa qaangiuppat aatsaat atuartunik ulikkaaqqinneqarsinnaalissasoq aqutsisoqarfiup nalilerpaa. Tamannalu sivisuneroratarsinnaavoq.

- Atuartut atuarfiup illuutaasa inuerutinneqarnerat pissutigalugu efterskolernertik piffissaq sioqqullugu naammasserusukkunikku periarfissaqarput. Periarfissamik sorlermik toqqaasimanerat apeqqutaatinnagu ukiumik atuarfiusumik ilivitsumik atuarsimasutut atuartut uppernarsaammik tunineqassapput, tusagassiuutinut nalunaarummi allassimavoq.

Tamatuma sanaitigut Maniitsumi Efterskolimi ukioq atuarfiusoq 2024/2025-mi atualernissamut akuerineqarsimasut atuarfimmit attavigineqarumaartut allassimavoq.

Maniitsumi Efterskolip siunissami qanoq pineqarumaarnera politikkikkut aalajangerneqarumaarput, tassanilu illuutit qanoq issusaannik nalilersuineq apeqqutaassaaq.

KNR-ip pisoq qanimut malinnaavigaa, Maniitsumilu efterskolimi atuartunut atualertussanullu tamanna qanoq kinguneqarumaarnera akissutersiniarsaralugu.