Tusagassiutit: Danmarkip amerikamiut kilitsissiatut sulisoqarneranik ikioraat
Amerikamioq isertukkanik kalerriisartup Edward Snowdenip isertortumik paasiniaasartut NSA - National Security Agency- pillugit allakkat uppernarsaatit isertortut arlallit, tusagassiorfimmut qanganngoreersumut Wikileaksimut 2014-imi ersersippai.
Ersersitsinerit ilaat tassaavoq, Danmarki Illersornissaqarfimmit Isertortumik Paasiniaasartuisut ittumik, amerikamiut isertortumik paasiniaasartuinik ukiorpassuarni kabelersuit aqqutigalugit suleqateqarsimasut.
Taamaalilluni Europami internettip oqarasuaatillu attaviisigut nakkutiginninnissamik, teknikkikkut kilitsissiatut sulinermik taallugu NSA suliaqarsinnanngortillugu.
Ersersitsineq 2021-mi DR-imit uppernarsarneqaqqippoq, tassani politikerinut qaffasissunut soorlu tyskit kanslererisimasaat Angela Merkelimut, alapernaarsuinermik suleqatigiinnerup atorneqarsimanera ersersinneqarsinnaasimavoq.
Suleqatigiinneq naalagaaffeqatigiinnermut sillimaniarnikkut ajornartorsiutaaratarsinnaalersoq, immikkut ilisimasallit maanna tusagassiorfimmut Ekstra Bladet-mut oqarput.
Præsident Trumpip amerikamiut isertortumik paasiniaasartui, Kalaallit Nunaanni paasissutissanik amerlanerusunik katersiartoqqusimagai, amerikamiut tusagassiorfiata Wall Street Journalip qaammatip aallartilaarnerani ersersippaa. Tamanna USA-mit kilitsissiatut sulisoqarneranik amerlasuunut siooralersitsivoq.
Kilitsissiatut sulineq illersorneqanngitsoq
NSA-mik kabelersuit aqqutigalugit qularnanngilluinnartumik suli suleqatigiittoqartoq, Ekstra Blademi ilanngutassiami immikkut ilisimasallit assigiinngitsut arlallit naliliipput. Tamannalu naalagaaffeqatigiinnermut kinguneqarsinnaavoq.
Illersornissaqarfiup Isertortumik Paasiniaasartuini misissueqqissaarnermi pisortaasimasoq Jacob Kaarsbop, suli suleqatigiittoqarnera eqqortuunersoq oqaatigisinnaanngilaa.
- Naalagaaffiup sillimaniarnissaata nukittorsarneqarnissaanut takorluugaaqqaaraluartoq, maanna eqqunngitsumik uagutsinnut saatinneqaratarsinnaavoq, Jacob Kaarsbo Ekstra Blademut oqarpoq.
USA-mik suli isumaqatigiissuteqartoqarpat, kilitsissiatut sulinermut naalagaaffeqatigiinneq illersorneqanngitsoq, Illersornissamik ilisimatusarfiup Periusissiornermut Sorsunnernillu ilisimatusarnermik immikkoortuani lektori Peter Viggo Jakobsenip aamma nalilerpaa.
- NSA-mit kilitsissiatut sulisoqarsinnaaneranut ammalluinnarlutalu saqqummisupilussuuvugut. Qularnanngitsumillu amerikamiut teknologiimik ingerlatsivissuiniit aamma, Ekstra Bladet naapertorlugu taamak Peter Viggo Jakobsen oqarpoq.
Qallunaat nunanut allanut ministeriata Lars Løkke Rasmussenip aamma illersornissamut ministerip Troels Lund Poulsenip Ekstra Bladep allaaserisaanut oqaaseqaateqanngillat.
