Christiansborgimi juullerpalaartitsinissamut peqataasinnaasutit
Juulli qallillunilu ukiortaarnissaanut avilualaaqqajaavoq. Folketingip nunarput pillugu ataatsimiititaliaa tamatumunnga atatillugu nunatsinnut attuumassutilinnik Christiansborgimi juullerpalaartitsinissaminut qaaqqusivoq.
Tassa Folketingip nunarput pillugu ataatsimiititaliaa “Illussaarsuarmi Juulli”-mik taallugu Christiansborgimi sisamangorpat decembarip ulluisa aqqaneq-aappaanni ualikkut sisamanut qiteqqunneraniit arfinermut qiteqqunnerata tungaanut juullerpalaartitsissaaq.
- Nunarput pillugu ataatsimiititaliami ukiumi nutaami sunik suliaqartariaqarnitsinnik nunarpullu pillugu tusagassiornermi suut ukkatarineqarnerusariaqarnersut isummannik ullormi tassani aamma avitseqateqarsinnaassaatit, Folketingip nunarput pillugu ataatsimiititaliaata siulittaasua Aaja Chemnitz (IA) qaaqqusissummini allappoq.
Pisussami tassani erinarsoqatigiittoqassaaq nipilersortoqassallunilu. Juullip Inua nunatsinniit aamma aqqusaarataannaasoq, taanna qaaqqusissummini aamma allappoq.
- Ukiup massuma ingerlanerani politikkikkut suliatta ukkatarinissaat soorunami pingaartippara, aammali ilorrisimaarnartumik nuannersumillu ataatsimoorluta ukiumik naggasiinissarput, Aaja Chemnitz oqarpoq.
“Illussaarsuarmi Juulli”-mik taallugu aaqqissuussami peqataanissamik nalunaarfissaq ulloq kingulleq ullumikkuuvoq marlunngorneq decembarip ulluisa qulingat. Peqataanissamik nittartakkami uani nalunaarsinnaavutit: Invitation: Jul på Slottet - Qaaqqusissut: Illussaarsuarmi Juulli | Tilmelding/Nalunaarfissaq.
