Canadap Issittumut politikkitaani saqqummiukkaa: Nuummi sinniisoqarfimmik pilersitsissaagut
Canadap Issittumut nutaamik politikkeqalernissaa pisariaqartoq ukiuni kingullerni oqallisaareersorlu, Issittumut politikkitaaminik tallimanngormat saqqummiussivoq.
Canadap nunanut allanut tunngasuni ministeria Melanie Joly aamma naggueqatigiit inuit siuttui arlallit, soorlu Inuit Tapiriit Kanatami præsidentiat Natan Obed Canadap Issittumut poliikkitaavanik saqqummiussisuupput.
Issittumi sinniisuutitanik marlunnik toqqaasoqassasoq, taavalu Nuummi Alaskamilu Anchouragemi sinniisoqarfinnik pilersitsisoqassasoq, Melanie Joly oqarpoq.
Canadap naalakkersuisuisa 35 millionit dollarsit, tassa 175 millionit koruunit missaat Issittumi sinniisoqalernissamut sinniisoqarfeqalernissamullu atulersaarpaat.
Kina Ruslandilu kimigiisertut
Kinap Ruslandillu Issittumi pissusilersornerat Ruslandillu Ukrainemut saassussinera pissutigalugit nunanut allanut tunngasuni nutaamik politikkeqalernissaq pisariaqalersimasoq, ministeri oqarpoq.
Tamatuma saniatigut kinamiut umiarsuaannik russillu umiarsuaannik Issittup imartaatigoortunik aasaq takunnittoqarpoq.
Aamma Trumpip – ingammik Canadap NATO-mi ilaasortaanera tunngavilersuutigalugu - illersornissamut aningaasartuuteqarnerunissamik ilaatigut piumasaqarnera Canadap Issittumut nutaamik politikkeqalerneranut pissutaaqataavoq.
Issittoq soqutigineqaleraluttuinnartoq, Natan Obed Tuluit Nunaanni naalagaaffiup aviisianut The Gazettemut oqarpoq.
- Issittoq nunarsuarmi tamarmi soqutigineqarpoq, Issittumilu sinniisoriligassatta Canadap naggueqatigiit inunnut nunallu inoqqaavinut Issittumi najugaliusunut attaveqarneranik pitsanngorsaaqataasussaassapput, Natan Obed.
Sinniisuutitat upernaaru toqqarneqarnissaat naatsorsuutigineqarpoq.
