Borgmesterit illersornissamut isumaqatigiissuteqarnissamut isumasiorneqarsimannginnertik isornartorsioraat

Borgmesterit Avaaraq Olsenip (IA) aamma Malik Berthelsenip (S) oqarnerat naapertorlugu naalakkersuisut illersornissamut isumaqatigiissutip nutaap isumaqatigiinniutigineqarnerani najukkani politikerinik ilanngutititsisimasariaqaraluarput.

Allattoq Thora Monrad Hansen, Ann-Sophie Greve Møller

oktobarip 16-at 2025 07:30

Nutserisoq Connie Fontain

Nunatsinni borgmesterit marluk, Avaaraq Olsen (IA) aamma Malik Berthelsen illersornissamut isumaqatigiissutip ilaa, Issittoq pillugu isumaqatigiissut 2-p sapaatip akunnerata siuliani tallimanngornermi saqqummiunneqarnerata kingorna nuannaarutiginnippallaanngillat.

Borgmesterit taakku marluk aperigaanni najukkani politikerit illersornissamut isumaqatigiissuteqannginnermi isumaqatigiinniarnermi ilanngutititsineq naammanngilaq. Tamanna isornartuusoq, Qeqqata Kommuniani borgmesteri, Siumumeersoq, Malik Berthelsen isumaqarpoq.

-Isumaqatigiinniarnermi ilanngutitinneqanngilagut imaluunniit isumasiorneqanngilagut. Naluarpulluunniit Kangerlussuarmi aningaasaliinissamut isumaqatigiissutit qanorpiaq ilaqarnersut, tassani nunaqarfinni atorfinnik nutaanik pilersitsisoqassanersoq aamma ilisimanngilarput, taanna oqarpoq.

Kommuneqarfik Sermersuumi borgmesteri, Avaaraq Olsen aamma taama oqariartuuteqarpoq.

- Uanga allatuulli nutaarsiassatigut paasivara, danskit naalagaaffiat Nuummi Umiarsualivimmut aningaasaliiniartoq— qularnanngitsumik Issittumi Sakkutooqarfimmut immikkut umiarsualiviliorniarneq pissutigalugu, taassuma tusagassiuutinut nalunaarutini taama aallartippaa, nangillunilu:

- Tassunga tunngasumik suli paasitinneqannginnama sumiitinniarneqarnersoq suli naluara. Tassunga tunngasumik oqaloqatigiinnerup ingerlateqqinneqarnerani kommunitut soorunami akuutinneqartariaqarpugut, illoqarfitsinnummi siunissaanullu sunniuteqaqataasussaavoq, borgmesteri tusagassiuutinut nalunaarummi oqarpoq.

Isumasiorneqanngitsoq

Avaaraq Olsenip oqarnera naapertorlugu nuummiut Nuup Umiarsualiviani sakkutuunut talittarfimmik takusaqartalernissaat isornartuuvoq. Illersornissaqarfiup umiarsuinut talittarfik illoqarfimmut allannguerujussuassasoq, taanna isumaqarpoq.

- Qinngutta kangerluata qeqqinnarsuani sakkutuunut talittarfiliorneq illoqarfiup ilisarnaataanut naapertuutiinnanngilaq aammali illoqarfiit pingaarnersaanni innuttaasunut takusassianngussaaq — ullut tamarluinnaasa eqqaasinneqaatigisassallugu sorsunnermik, sakkussialersornermik sakkutuulersornermillu, tamakkulu illoqarfitsinni pingaartinneqartut mumingarluinnaraat, Avaaraq Olsen oqarpoq.

Borgmesterip Inuit Ataqatigiinneersup “sorsunnermut sakkussialersuinerunermillu aallaaveqartitsisoqarneranik” unitsitsisoqassasoq kissaatigaa, Malik Berthelsenilli Kangerlussuup isumaqatigiissummi maannakkumit ilaatinneqarnerunissaa kissaatigaa.

Issittoq pillugu isumaqatigiissut 2-mi suliniutit

Danmark Issittup aamma Atlantikup avannaata illersorneqarneranut 27,4 milliardit koruuninik aningaasaliissuteqarpoq. Suliniutit ilaat uani ataani allassimapput.
Kalaallit Nunaata Danmarkillu akornanni imaatigut kabelimik pilersitsisoqassaaq.
Timmisartuaqqanik inuttaqanngitsunik illersornermut nakkutilliinermullu 2,1 milliardit koruunit atorneqarput.
Dronit (timmisartuaqqat inuttaqanngitsut aaqq.) nutaat nukittorsaataassapput “pisuni takunnissinnaanermik”, pisuni nutaani, Illersornissaqarfiup najukkani oqartussat tapersersuleraangagit, Savalimmiuni aamma Kalaallit Nunaanni.
Tamatuma saniatigut issittumi umiarsuit marlunnik timmisartunillu imaani nakkutilliissutit ilaneqassapput.
Issittumi Sakkutooqarfik Nuummi nutaamik qullersaqarfiliorneqassaaq.
Issittumi sakkutooqatigiinnik nutaanik immikkut piginnaanilinnik pilersitsisoqassaaq, taakku Issittumi Sakkutooqarfiup ataaniittussapput.

Paasissutissarsiffik: Ritzau/Forsvarsministeriet

Allisiguk

Isumaqatigiissummi Kangerlussuup Mittarfiani pissutsinut pitsaanerulersitsisoqarnissaanut aningasaliissutinik immikkoortitsisoqassasoq allassimavoq. Tamanna assersuutigalugu tassaasinnaavoq illersornissaqarfiup illuutaannik iluarsartuussineq, timmisartunut mittarfiup isumannaallisaaneq pitsanngorsaanerlu.

- Nunatsinni illersornissap sillimaniarnerullu pitsanngorsarneqarnera pissusissamisoorluinnarpoq. Naalakkersuisut danskit naalakkersuisa akornanni nunatsinni aningaasaliinerujussuarmik qulakkeerisoq pillugu isumaqatigiissuteqarneq pillugu naalakkersuisut nersualaarnissaat inissaminiippoq, taanna oqarpoq, nangillunilu:

- Ungaserujussuanngitsukkut danskit naalakkersuisui nunarput saassunneqaraluarpat tamakkiisumik illersuisinnaannginnerarlugit isornartorsiorpagut. Taamaammat annertuumik aningaasaliinissamut isumaqatigiissuteqarnerat pitsaasuuvoq.

Aamma atuarukMotzfeldt innuttaasunut eqqissisaallunilu Aki-Matilda akerlileraa: - Naleqqap paasissutissat qujaannarfigai

Taamatullu oqarluni parteeqatimi, nunanut allanut naalakkersuisup, Vivian Motzfeldtip (S) najukkani politikerinik isumaqatigiinniarnermut isumasiuisimannginnera uggoraa.

Kangerlussuarmi atlantikoq qulaallugu mittarfiup Nuummut nuunneqarnerata kingunerisaanik ilungersuavoq.

- Kangerlussuarmi atorfippassuit annaavagut, taamaammat nunaqarfimmi atorfinnik ataavartunik pilersitsisoqarsinnaanissaa neriuutigigaluarparput.

- Issittumi Sakkutooqarfiup qullersaqarfiata Nuummiinnissaanut atorfillit ilaqutaasa suliffissaqarnissaanik qulakkeeriniarneq pissutaasoq ilisimatitsissutigineqarpoq. Taamaalilluni Kangerlussuaq naleqqunnani, Malik Berthelsen oqarpoq, paasissutissallu sumit pissarsiarisimanerlugit itisilernagu.

Nuuk qitiusoq

Berthelsenip nammineq oqarnera naapertorlugu taamaammat naalakkersuisut danskillu naalakkersuisuisa akornanni isumaqatigiinniarnerit sioqqullugit nammineq saaffiginnissuteqarsimavoq.

- Naalakkersuisunut ikinnerpaamik pingasoriarluta allakkatigut saaffiginnissuteqarpugut, suleqatigiinnissamut aamma neqerooruteqarpugut, attavigineqanngilagulli, taanna oqarpoq.

Taassumali Nuup isumaqatigiissummi nutaami qitiunerulernera eqqarsarnartoqartinngilaa.

- Allaanngilaq naalakkersuisugut Nuup avataani inuusoqarsinnaannginneranik uppertinneqalersimasut. Kikkut tamarmik Nuummi najugaqarusunnerat allanngortinneqarsinnaanngitsoq tunngavilersuutigaat, kisianni eqqaamassavarput ilinniarsimasortagut inuusuttullu Nuummut katiterneqarpoq, atorfiimmi akissarsiarissaarfiusut tamarmik Nuummiipput, Malik Berthelsen oqarpoq.

KNR-ip isornartorsiuineq Vivian Motzfeldtimut saqqummiuppaa, taannalu isornartorsiuinermut akissuteqarpoq, taamaammat ilanngutassiaq malitseqassaaq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.