Avannaani borgmesterinngortoq takornarianit aningaasarsiorusuttoq
Siumumit Lars Erik Gabrielsen Avannaata Kommuniani borgmesteritut maanna atuutilerpoq. Tamanna kommunalbestyrelsit nutaat pillugit "isumaqatigiinniarluartoqarnerata" kingunerani pisoq taassuma oqaatigaa.
Avannaata Kommuniani kommunalbestyrelse nutaaq, 17-inik ilaasortalik, inissilluni sapaatit akunnerisa siulianni, pingasunngornermi, ataatsimiippoq.
Siumumit qinigaanerpaaq, Lars-Erik Gabrielsen, borgmesteritut amerlanerussutilinnit toqqarneqarpoq. Siumut Nalerarlu katillutik qulinik ilaasortaqarlutik tunuliaqutsiisuupput.
Borgmesterinngortup atuuffimmini ilisarnaatigerusutani ima oqaasertalerpaa:
- Tassa ilisarnaatigissuaa innuttaasunik nukittorsaanissaq, eqqarsartaatsikkut nukittorsaanissaq annertoorujussuarmik uanga ilungersuutissama annerpaarpaat ilagivaat, Lars Erik Gabrielsen KNR-mut oqarpoq.
Aningaasanik aqutsineq meeqqanut
Taassuma aningasanut tunngasut meeqqanit ilisimasaqarfigineqarnerunissaat aamma kissaatigaa.
- Sooq anaana ataatalu sulisariaqarnersut, qanoq suna akeqarneri atuarfimmi meeraaneranit paasititsiniutigerusupparput aningaasanut tunngasut, taanna oqarpoq.
Borgmesteinngortoq takornarialerisuullunilu sanasutut aningaasarsiorfeqarluni suliaqartarpoq. Taakkuali tamaasa attuumassuteqarfigiunnaassallugit oqarpoq.
- Ataatsimoorluta suliffeqarfiliarisimasatsinni siulersuisuni siulittaasuuvunga, taanna tunussuara. Tunuartussaavunga taputartuunneqannginnissaa pillugu.
- Taava suliffeqarfinnguamik ingerlataqarpugut, meeqqama nangissuaat. Aputsiap Aqissiallu nangissuaat.
Borgmesteritummi sulinermini aporfissaqarusunngilaq.
- Arlaatigut uanga apeqquserneqarsinnaannginnera qulakkeerusuppara, taanna oqarpoq.
Borgmesteri: Ilulissat avataanit aningaasalersorneqarnerusariaqarpoq
Lars Erik Gabrielsenip takornarialerisut nunanit allaneersut Ilulissani suliaqarlutik aningaasarsiortarnerat Avannaata Kommunianut pitsaanerusumik kinguneqartartunngorusuppaa.
Akileraartalernissaammi iluanaarutiminnillu aningaasanik annissisarnerat annikinnerulersikkumallugu oqaloqateqartarusuppoq.
- Takornariaqarnerup silarsuaani avataaninngaanneersut annertoorujussuarmik illoqarfitsinnit iluanaaruteqartut illoqarfitsinnut utertitsisariaqalerput. Taanna atuuppoq, lommepengeqaannarlutik suliartortartut eqqarsaatigalugit taakku illoqarfitsinnut akileraartunngortikkusuppagut. Aamma suliffeqarfissuit periarfissaqarnertik aallaavigalugu iluanaarutinik annissisarnerat oqaloqatigiinnikkut illoqarfitsinnut akileraartunngortikkusuppagut, Lars Erik Gabrielsen oqarpoq.
Jens Napaattooq, Naleqqameersoq, borgmesterip tulliatut siullertut atuutilerpoq. Heidi Møller, Demokraatineersoq, borgmesterip tulliata aappaattut aamma atuutilerpoq.
