Atuartut immikkut pisariaqartitsisut amerlisut
Atuartut immikkut tapersersortariallit amerliartortut, ilinniartitaanermut pilersaarummi 2025-meersumi atuarneqarsinnaavoq. Tamanna Kangillinnguit Atuarfianni takornartaanngilaq. Atuartummi amerliartuinnartut immikkut pisariaqartitsut tassanittaaq takussaaleraluttuinnarpoq.
- Atuartut immikkut pisariaqartitsisut siornatigornit amerlanerusut malugaarput, atuarfimmi pisortap tullersortaa, Vivi Heilmann oqarpoq.
Inissaasuaneq aamma sulisussaaleqineq pissutigalugit atuartitsinermi atuartunut immikkut pisariaqartitsisunut tulluarsaaniarneq ajornakusoortoq, taanna oqarpoq.
- Atuartut pisariaqartitsisut klassini atuartukinnerusumiinnissaminnik pisaqariaqartitsisarput, inissaaleqinerli pissutigalugu taamaaliorsinnaanngilagut, taanna oqarpoq.
Kangillinnguit Atuarfiat kisimi taama aqqusaagaqanngilaq. Ilinniartitsisut Meeqqat Atuarfianneersut Kattuffiat, IMAK, naapertorlugu sipaarniuteqarnerit pissutigalugit atuartorpassuit specialklassinut ulikkaaqqasunut inissineqartarput. Meeqqat atuarfianni immikkut atuartitsisarneq pillugu nalunaarusiaq naapertorlugu specialklassimi atuartut amerlanerpaamik arfineq-pingasuussapput, atuarfiilli ilaanni aqqaniliutinneqanngikkunik aqqaneq-marluutinneqartarput.
Specialklassinili amerlavallaanik atuartoqaleraangat atuartut immikkut tapersersortariallit taakkuusarput eqqugaasartut. Taakkumi ikiorneqarnissaq aaqqissuussaasumillu atuartinneqarnissaq pisariaqartitartik pinagu klassimi atuartoqarpallaartumiilersinnaasarput, ilinniartitsisumiillu piffissaqarfigineqartanngillat ataasiakkaatullu pisariaqartitaat nukissaqarfigineqassanani. Taamaalilluni aaqqiissutissatut eqqarsaataagaluartoq atuartup eqqissilluni ineriartornissaraluanut aporfinngortarpoq.
Immikkut pisariaqartitsisunut persorsaanermik ilisimasat pisariaqartinneqaqisut
Atuartut immikkut tapersersortariallit amerliartornerat atuarfinni klassiniinnaq malugineqanngilaq. Atuartut tapersersortariaIlit eqqarsaatigalugit immikkut pisariaqartitsisunut perorsaanermik ilinniarneq, Ilinniartitsinermik Ilisimartusarfimmi ilikkagassanut ilanngunneqarsimavoq.
- Immikkut pisariaqartitsisunut perorsaanermik ilinniarneq toqqagassanut ilaasarpoq, toqqaasartulli ikippallaartarput. Taamaammat taanna fagi ilinniartut tamarmik pisassaattut inissipparput, kisianni toqqagassaaneranit annikinnerusumik sammineqartarluni, Ilisimastuarfimmi Ilinniartitsinermik Ilisimatusarfiup pisortaa, Britta Lohmann oqarpoq.
Immikkut pisariaqartitsisunut sammivilimmik perorsaanilerinermi ilinniarneq ilinniartitsisunngornianut aamma neqeroorutaasarpoq, kommuninili sulisussaaleqineq pissutigalugu ilinniartitsisut ilinniaqqinnissaminnut periarfissagissaartanngillat.
- Immikkut pisariaqartitsisunut sammivilimmik perorsaanilerinermi ilinniarnermik periarfissaqartitsivugut, amerlasuullu qinnuteqartarput, aallartissinnaasaratilli – tamatumunnga pissutaakkajuttarpoq atuarfiup pisortaata ingerlatsiviulluunniit aningaasassaqartitsisannginnerat, Britta Lohmann oqarpoq.
Tamaattumik ilinniarnissamut qinnuteqartartut ikippallaartarmata aallartitsisoqarsinnaaneq ajorpoq. Soqutiginnittoqarmalli pikkorissarnerit sivikinnerusut neqeroorutigineqartarput, pisariaqartitsinerli annertuneroqaaq.
- Pikkorissarneq ilinniaqqinnerlu pisariaqartinneqaraluaqisut, taamaattoq kommunit akissaqarfigineq ajorpaat, Britta Lohmann oqarpoq nangillunilu:
- Atuarfeqarpoq ajornartorsiuteqaqisunik ikiorneqartariaqartunillu. Ikiuukkusukkaluarput, kommunilli aamma akisussaaffeqarput. Atuagarsornikkut ikiuussinnaavugut, kisianni atuarfik iluamik ingerlanngippat tamanna kommunip akisussaaffigaa.
Akisussaaffillu taanna kommunip tigunngikkaa Britta Lohmann misigisimavoq. Taassumali atuarfiit atuarfiit ilaanni sammisat atuarfiup nammineq isumagisassaanik ujartuisoqartartoq misigigajuppaa.
Tamatuma saniatigut ilinniartitsisunngorniarfiup "tarnikkut ikiueqqaarneq" pikkorissaanernut ilanngunneqassasoq peqqussutiginikuuaa. Pikkorissaanerit soqutigineqarluartuullutillu piumaneqartorujussuupput, peqqussummulli aningaasaliinissaq ilanngunneqarsimanngilaq.
- Pisariaqartinneqarnera pissutigalugu pikkorissaasarpugut, imarisinnaasaanilli amigaateqarneq pissutigalugu peqataarusuttut ilaannik itigartitsisariaqartarpugut. Uagutsinnut suliakkiutigineqarpoq, pikkorissaanissamulli sakkussanik tunineqarnikuunngilagut, Britta Lohmann oqarpoq.
Ilinniartitsisunngorniarfiup suliassat amerlinerat matugigaa aningaasassalli taamaaginnartut - imaluunniit annikinnerulersut takussutissutissaqarpoq.
Naalakkersuisut ilinniarneq pillugu periusissiaa qimerlooraanni Ilinniartitsisunngorniarfimmut 2016-imit 2022-mut aningaasaliissutit 16 millionit koruuninik annikinnerulersinneqarsimasut nassuiaatigineqarpoq. Taamaammat aningaasat suliassaqarneruleraluartoq annikinnerulersimapput.
Kommune suleqataasariaqartoq
Lisa Korneliussen meeqqat atuarfianni ukiorpassuarni ilinniartitsisuuvoq, maannalu Ilinniartitsinermik Ilisimartusarfimmi lekoriullunilu perorsaanikkut tarnip pissusianik immikkut ilisimasalittut sulivoq, atuarfiullu pisortaanut tullersortip, Vivi Heilmannip, atuartut immikkut pisariaqartitallit ilinniarsimasunit tapersersorteqarnisaannik oqarnera taassuma ilisarisinnaanerarpaa.
Taamaammat ilinniartitsisut ilinniarsimasut ilinniaqqissinnaasannginnerat taassuma aamma suleqatimisulli aarleqqutigaa.
- Kommunit piginnaanngorsaanernut tapersersuisussaatitaapput. Ilinniartut tunngaviusumik ilisimasassannik ilinniartissinnaavagut, sulinerminnili aqqusaartagaat ilungersunarnerukkajuttarput. Ilinniartitsisunngorniat immikkut ilisimasalittut atuuffeqartussanngortillugit ilinniartinneq ajorpagut, taanna oqarpoq.
Ilinniartut atorfimminni sulilernissaannut, perorsaanermi periutsinik, nappaatip suussusianik paasinninnermut ilisimasanik meeqqanullu immikkut pisariaqartitsisunut, sapinngisartik tamaat piareersartarlugit ilinniartitsisunngorniarfimmi Studieadjunkt Katrine Munch Kirstedip ilanngullugu oqaatigaa. Atuagarsornerli ingerlatsinerlu assigiinngissuteqarput.
Ilinniartitsisut klassini ajornartorsiutit taamaattut naammattoorunikkit isumaginissaannut pingaarutilinnik pikkorissassallugit atuarfiit kommunillu akisussaaffigaat qulakkiissallugu, taakkua isumaqarput.
Suliniutit nutaat
KNR-ip isornartorsiuineq Kommuneqarfik Sermersuumut saqqummiuppaa, tassanngalu atuartut immikkut ittumik pisariaqartitsisut amerliartuinnarnerisa ajornartorsiutaanera atuarfimmit nalaanneqartoq nassuerutigineqarpoq.
Kommunip suliniutit arlallit matumani ilinniartitsisunut immikkut ittumik perorsaanermik pikkorissaanerit siunnersortit ilinniartitsisullu akimorlugit suleqatigiinnermut pitsanngorsaanerit ilanngullugit aallartissimagai allappaat. Tamatuma saniatigut atuartunut immikkut ittumik pisariaqartitsisunut soorlu autismeqartunut immikkoortortanik nutaanik pilersitsinissaq pilersaarutaavoq.
Meeqqat atuarfiinut ikiueqqaarneq
Naalakkersuisoqatigiit isumaqatigiissutaat partiinit sisamanit 28. Marsi atiorneqarpoq. Isumaqatigiissut meeqqat atuarfiinik nukittorsaallunilu atuartunik ajunnginnerusumik atugaqarnissaannik qulakkeerisussamik suliniutinik imaqarpoq.
Partiit naalakkersuisoqatigiit atugarissaarnermik, tarnikkut peqqissuuneq kiisalu atuartunut nappaatiminnik suussusersineqarnikunik immikkullu pisariaqartitsisunik ukkatarinninnerunissaq akueralugu misileerusupput.
Siunnersuutigineqartut erseqqissut ilagaat, klassimi ataatsimi atuartut amerlanerpaaffissalerneqarnissaat – suliniut ukiorpassuarni atuarfinniit pimaneqartuartuusoq.
Politikerit angusaqarusussusaat piviusorlu klassit ulikkaaqqasut ilinniartitsisut atuartullu misigisartagaasa akornanni qanoq ataqatigiitsigissanersut, atuartitsinermilu pitsaassutsimik qulakkeerinninnissap avaqqunneqarsinnaannginnera piffissap takutikkumaarpaa.
- Ilinniartitaanermut pilersaarutip iliuuseqartoqarnissaa pisussaaffilerpaa. Tamanna tamatumuuna puiorneqassanngitsoq neriuutigineqartoq, Britta Lohmann oqarpoq.
