Savalimmiuni politikeri: Atlantikup avannaani ilaasortat tunngavissaqanngitsumik pissaaneqarniartut
- Pisuusaarneq erseqqippoq aamma aaqqissussaanermik kikkut tamarmik atornerluisuupput.
Taamak Savalimmiut folketingimi ilaasortaatitaat Sjúrður Skaale socialdemokratiske parti Javnaðarflokkurinermeersoq oqaaseqarpoq.
Savalimmiuni innuttaasut folketingimut marlunnik ilaasortaatitassaminnik taasisinnaasarnerat, aaqqissuussaanermi kukkunerusoq politikeri isumaqarpoq. Qallunaat inatsisiliornerannut sunniuteqaqataasarput, qinersinermili qallunaat pillarsinnaatitaanngillat.
Atlanikup avannaani politikerit pissaaneqarnerat – tassunga ilanngullugu aamma nammineq pissaaneqarnini – tunngavissaqanngitsumik, Sjúrður Skaalep taavaa.
Savalimmiut Kalaallit nunaatalu qallunaat politikerii inatsisartoqarfimminni qaquguluunniit akuerinavianngilaat. Assinganillu qallunaat, atlantikup avannaaneersut ilaasortat akuerisinnaanngikkaat Sjúrður Skaale misigisimavoq.
- Qallunaat qinersisartuinut pissaaneqarpugut, taakkuli tamat oqartussaaqataanerannut angusinnaasaat uagutsinnut naammanngilaq. Qallunaat suliaannut, uagut qinersisartutsinnut attuumassuteqanngitsunut akuliuttarnerput, maannamut ajornartorsiutinngoreerpoq.
Pisuusaarneq atornerlunneqartoq
Folketingimi tatiginninnginnermik sisamanngormat taasisoqarpoq. Qallunaat silap pissusianut ministeriat Lars Aagaardi (M) qallunaanit amerlanerussuteqartunit uppisikkusunneqarpoq. Ministerili Savalimmiuniit Kalaallit Nunaanniillu Aaja Chemnitzimit (IA) tapersersorneqarnermigut taasineq aniguiffigaa.
Qallunaat politikkiannut akuliunneq, savalimmiormiut kalaallillu folketingimi ilaasortaannut akerleriinnerulersitsisoq, Sjúrður Skaale isumaqarpoq. Qallunaat politikeriinit piumallerlutillu Atlantikup avannaaneersunut ilaasortaatitanut aamma politikkikkut akerleriittoqartoq, taanna misigivoq.
- Qallunaat tusagassiortuisa politikeriisalu nunanut allanut tunngasuni politikeriunerartarpaatigut. Qallunaat politikeriisa akorngannit pisuusaarneruvoq erseqqissoq. Illuatungiliuttuunerit tamaasa atlantikup avannaani ilaasortaatitat amerlanerussuteqarnerat naammagittaalliuutigineqartarpoq. Naalakkersuisoqatigiikkaannili tamat oqartussaaqataaneranni malittarisassanik atuutsinerummat ajornartorsiutitaqanngitsoq.
Savalimmiuni politikerip akerlerilluinnakkaminik pissaanermik atuisarnini pillugu pisuusaaqataanini aamma nassuerutigaa.
Tunngavissaqanngitsumik pissaaneqarniarnertut taassallugu, namminerlu atornerlullugu imminut akerlilernerunngila?
- Ilumorluinnaq. Aaqqissuussaaneq taamaakkallartillugu imminut akerlilerneq piujuassaaq. Savalimmiuni inummik Folketingimi inatsisinut sunnertikkusunngitsumik qinersisoqanngisaannartussaavoq. Aamma atlantikup avannaaneersunik qinikkanik, sulisoqarnissamik periarfissamik atuerusunngitsumik naalakkersuisut siulittaasuannik qallunaamik pissarseratarsinnaanngisaannassaatit. Qaqugumulluunniit piviusunngornavianngilaq.
Kalaallit Nunaat Danmarkimi
Nutaamik naalagaaffeqatigeeqalissappat Sjúrður Skaale Folketingimi savalimmiormiut ilaasortaatitaannik atorunnaarsitseqqaarusuppoq. Kisianni Kalaallit Nunaat Savalimmiullu Danmarkimut atassuteqarnerat assigiinngimmat, kalaallinik ilaasortaqarunnaassanersut oqaatigisinnaanngilaa.
Savalimmiut Kalaallit Nunaanniit suliassaqarfinnik amerlanerusunik tigusaqarnikuunerat peqqutaalluni, Danmarkimi kalaallinik politikereqarnissaq suli pissusissamisoortoq, Aaja Chemnitz isumaqarpoq.
- Ulluinnarnilu suliassat, soorlu ministerit neriorsuutiminnik piviusinngortinnissaannut qulakkeerinninniarnermi apeqqusersuinerit, ataatsimeeqateqarnerillu pisariaqarput. Taamaalilluta inatsisartuni nakkutiginninnermik siulersuisinnaassaagut, taanna oqarpoq, nangillunilu:
- Ulluinnarni kalaallit oqaaseqartartuanik maannakkut ilaasortaatitaqarunnaarniarutta kukkuluttornerussaaq.
Naalagaaffeqatigiinneq nutaaq
Naalakkersuisut siulittaasuat Jens-Frederik sapaatip-akunnerata naanerani Danmarkimiippoq. Tassani ministeriuneq Mette Frederiksen peqatigalugu naalagaaffeqatigiinneq nutaaq pillugu naalakkersuisut isumaqatiginninniarnissamik kissaateqarnerat oqallisigaat.
Sjúrður Skaale naapertorlugu naalagaaffeqatigiinnerup nutaanngornissaa qanillivoq.
- Sukkasuumik tamanna pisinnaavoq, taanna oqarpoq.
Naalagaaffeqatigiinnermi nutaami Atlantikup avannarpasissuaneersunik folketingimi ilaasortaqarnissaq imaassinnaasoq pisariaqarnavianngitsoq, Sjúrður Skaale isumaqarpoq.
- Naalagaaffeqatigiinnermi nutaami nunatut naligiinnerulluta, folketingimi savalimmiunut inatsisiliorsinnaatitaannginnissaat kissaatigaarput.Naalagaaffeqatigiinnermi taamaattumi Folketingimi ilaasortaqarnissaq naleqqutinngilaq. Naalakkersuinerup tungaatigut naligiinnerusumik suleqatigiinneruvoq, naalakkersuisullu akorniminni isumaqatigiissutaat naalagaaffeqatigiinnermi aqutsisuusoq, tamattalu immikkut naalakkersuisusut ilaasortaannik inunnik ataasiakkaarinata, taanna naggasiivoq.
