Assit videollu: Vivian Motzfeldtip Nuummut tikinnera persuarsiutigineqartoq
Nunanut allanut tunngasunut Naalakkersuisoq Vivian Motzfeldt (S) Nuummi mittarfimmut tikinnissaanut inuit 100-t missaanniittut tikilluaqqusipput.
Taanna sapaatip-akunnerani ulapingaatsiareerluni, tassa Washingtonimi pingasunngormat ataatsimeeriarluni Bruxellesimilu Nato ippassaq ataatsimeeqatigeriarlugu, ullumi nalunaaqutaq 12.35 tikippoq.
Tikilluaqqusisunut ilaapput meeqqerivimmiut. Cecilie Vahl Erfalasorput tigummiarlugu piareersimasoq KNR-ip aamma naapippaa.
- Peqataavunga Vivian Motzfeldt tikilluaqqorusullungu
Assorujussuaq tanngassimaarutigivara nunarput sinnerlungu nunarpassuarnik ataatsimeeqateqaqattaarnera pillugu.
Nalilerujussuuvoq, Cecilie Vahl KNR-imut oqarpoq.
Aqqalukkuluk Fontain Naalakkersuisoq tikilluaqquniarlugu najuuppoq.
- Vivianip sinnerluta USA-mukarnikuunera oqariartuutigalugu Kalallit Nunaat Kalaallut pigigaat, takutikkusullugu aamma taperserneqartoq tamanit.
Misigissutsit qaffakaasorujussuupput, tulluusimaarneq, qiarusunneq, ataatsimoorneq misigissuserpassuit atorpagut. Killitsisimaarpugut, taanna KNR-imut oqarpoq.
Vivian Motzfeldt KNR-imit aperineqarnermini akissuteqarnermini eqqissiallaqqasoq erseqqippoq:
- Angerlamut apuukkama nuannaaqaanga, nunaqqatikka takullugit tikilluaqqusaaneq angisooq assorsuaq tuppallissutigivara suliassagut suli amerlaqaat kisianni alloriarfissaq siulleq ilusiligarput taanna neriuummik pilersitsivoq, taanna oqarpoq.
- Angerlamut apuunnera, asasakka maaniimmata, nunaqqatikka kinguaakka, ilaquttakka, erngutaaqqakka, nunaqqatikka tamaasa tikiffigigakkit eqqissiallappunga. Aamma soorunami suliat nunatta oqariartuutai nunarsuarmut anngutereerlugit kisiannilu nalunagu suli suliassarpassuaqarluta, suli tamaviaarluta suli ataatsimoorneq pisariaqartitarput taanna pigalugu tamatta ingerlaqatigiinnissarput neriuuteqarfigalugu tikippunga.
- Massakkut pilluarpunga naak avatangiisigut pilluarnaatsorpassuugaluartut.
