Presidents Cup: Assammik arsartartut nuannaartut VM-imi siullermeertumik ajugaanissartik neriuutigigaat

Naak assammik arsarnermi nunanut allanut unammisartut Stavangerimi VM-imi unamminerminni pingasoriarlutik ajorsareeraluarlutik nuannaartorujussuullutillu ilorrisimaarlutik ajorsartut ingerlaqqiffiannut peqataajartorlutik Danmarkimi Frederikshavnimut ingerlaqqipput.

Nunammi tamalaat peqataaffigisaanni unammineq angisoorujussuuvoq. Nukaaka Lyberthimut VM-imi Korea Kujallermut unamminermi siullermeerluni isertitsisumut ilaatigut taamaappoq.

- Nuaan, nuannerujorujorsuarpoq tupinnaannartumik. Ilumoortumik misigissutsit tamaasa, tamaat isiginnaartut tusaasinnaallugit qanoq nuannaartigisut. Holdeqatit aamma nuannaaqataarsuaartut nuanneqaaq, Nukaaka Lyberth qungujulalluinnarluni oqarpoq.

Måliniittartoq Aviaaja Heilmann Korea Kujallermut unamminermi aamma annaassisaqattaarpoq. Taassumalu takutitsilluaqattaarnini aamma nuannaarutigaa.

- Ingasak, ukiorpassuit sungiusarnikuulluni taamatut internationalimi VM-imi annaassisaqattaarluni nuannivatavataarpoq, taanna oqarpoq.

KNR-ip Unammisartut nuannaarluinnartut Danmarkimi Frederikshavnimiit videoliuutikkut oqaloqatigai. Assi © : KNR

VM-imi siullermeerlutik ajugaaniarsariniartut

Nunanut allanut unammisartut unamminerni siullernit ingerlaqqinngitsoortarnikuugaluarput. Holdilli tamarmik maanna inissinniuttussaapput. Taamaammat kalaallit assammik arsartartut Frederikshavnimi ingerlanneqartumi, Presidents Cupimik taaneqartartumi 25-mit 32-nngorniuunnermi peqataassapput.

Siullermillu Islandimut unammipput, arfininngorpat Kinamut unammissapput ataasinngornermilu Paraguayimut unammissallutik.

Unammisartullu unamminissaminnut qilanaarput. Islandimulli unammilluni aallartinneq sakkortulaassasoq, Aviaaja Heilmann oqarpoq.

- Ja pissanganarpoq, unammisassagut taakku anginermut fysiskiatigullu aamma anginerullutik uagutsinniit. Taava kisiat neriuuteqarpugut tassami unammillernissarput suli sakkortuumik piumavarput.

Kalaallit arnat assammik arsarnermi nunanut allanut unammisartut VM-imi suli ajugaannginnamik siullermeerlutik ajugaanissartik neriuutigaat.

- Soorunami naatsorsuutigaarput aamma uagut nunat arlaat ajugaaffigisinnaassallugit. Soorunami undervurderernianngikkaluarlugit kisianni sukataarpugut, sukataarusuppugut assut tamatta aamma ajugaarusussuseqarpugut, måliniittartoq oqarpoq.

Titarnerup killingani arsartartup Nukaaka Lyberthip isumaqatigaa.

- Aamma angorusukkatsigu kalaallit VM-imi ajugaanissaat, oqaluttuarisaanermi suli kalaallit VM-imi ajugaanikuunnginnamik taanna angorusuttorujussuuarput, taanna oqarpoq.

Timersortuni oqaluttuusartup, Nah Mølgaardip oqarnera naapertorlugu nunatsinnit nunanut allanut unammisartuisa Islandimut ullumi unamminissaat ajornaatsuinnaanavianngilaq. Kinamulli Paraguayimullu unamminermi VM-imi ajugaanissaannut periarfissaqarnerusoq, taanna naliliivoq.

Nunatta Islandillu unamminerat KNR TV-kkut nal. 15 toqqannartumik aallakaatinneqassaaq.

Unamminissat tulliuttut KNR TV-kkut aamma isiginnaarneqarsinnaassapput.