Danskit parnaarussiviini inissat parnaarussanit ikinnerusut

Danmarkimi parnaarussiviit, inissat parnaarussanit ikinnerulermata, tattoqiffiunerulerput.

Parnaarussivinni sulisut kattuffiat tusagassiuutinut nalunaarummi taama allappoq.

Danmarkimi parnaarussivinni parnaarussat massakkut 4650-iupput inissalli 4300-innaallutik.

Danmarkimi parnaarussiviit aatsaat taama ulikkaaqqatigaat, kisitsisinngorlugulu tamanna agguaqatigiissillugu 105,4 procentiuvoq. Kisitsit taanna ukioq kingulleq 102,7 procentiuvoq.

Parnaarussarpassuit inissakilliortitsipput parnaarussiviillu inissaataannik ilungersunartumiisitsilerlutik.

Parnaarussiviit inissaataannit amerlanerusunik parnaarussaqaraangat tamanna parnaarussivinnik ulikkaartitsisarpoq.

Tamatuma kingunerisaanik ineeqqami inuit marluk inissaqalerniassammata, ineeqqat quleriinnik marlunnik siniffilersorneqartarput, imaluunniit ini sammisassaqartitsiviusartoq, init pulaarfissat allaffiilluunniit parnaarussat ineeraattut atorneqalersarput.

Pisoqalivallaariartortut

Vejlemi parnaarussivik inissakilliornerpaaffiuvoq, tamannalu kisitsisinngorlugu agguaqatigiissillugu ukioq manna 135 procentiuvoq.

Jan Bruunip, Vejlemi parnaarussivimmi sulisut sinniisaata oqarnera naapertorlugu, tamanna parnaarussivimmut pisoqaliartoraluttuinnarnermik kinguneqarpoq.

- Parnaarussat inissarsiuunnissaannut piffissangaatsiaq atortarparput, paarlaassuilluta, ineeraq marluuttariaq parnaarussat marluk akornanni ilungersunartorsiorfiuppat, parnaarussat ilai allagarsisinnaallutillu pulaartoqarsinnaanngoraangata paarlaassueqqittarluta, taanna nalunaarummi oqarpoq.

Hillerødip parnaarussiviani parnaarussat inissanut naleqqiullugit kisitsisinngorlugit agguaqatigiissillugit 140 procentimiippoq, parnaarussivimmiillu oqaatigineqartoq naapertorlugu, sulisunut piumasaqaatit tamatuma kingunerisaanik annerulerput.

Parnaarussarpassuillu Randersip parnaarussiviani aamma malugineqarput, parnaarussat inissanut naleqqiullugit kisitsisinngorlugit agguaqatigiissillugit 115 procentimiimmata.

Parnaarussiviup sulisuisa sinniisaata oqarnera naapertorlugu, tamanna parnaarussat sulisullu akornanni akerleriissuteqartoqarnerulerneranik kinguneqarpoq.

Tamannalu ilutigalugu, Danmarkimi parnaarussiviit suli inissakilliornerulernissaat ilimasuutigineqarnera nalunaarummit paasinarsivoq.

Tamanna pinngitsaaliilluni atoqateqarnermut nakuusernermullu pillaatisiassat sukaterneqarnerannik ilaatigut pissuteqarpoq. Sukaterinerit affai ukioq manna februaarimi atuutilerput, sukaterinissallu allat januaarimi atuutilissallutik.

RITZAU