Futsal: Arnat nunanut allanut unammisartut Kroatiami pikkorissunut unammissamaalersut
Illup iluani arsaannermi arsaattartut 15-it arnat nunanut allanut unammisartuinut toqqarneqarput. Taakku junimi Ukrainemut Kroatiamullu unammisitsinermi Futsal Weekimi Kroatiami unammissapput.
Ole Martinsen sungiusaasutullu ikiortaa Peter Davidsen Hardenberg isumaliutersungaatsiarsimapput arsartut sorliit suleqatigiilluarsinnaanersut pillugit.
- Assut nuannerpoq arnarpassuit Nunatsinni pissartanngorniunnermi peqataammata. Aamma maluginiarparput inuusuttorpassuit saqqummeralersut, nuna tamakkerlugu sungiusaasoq Ole Martinsen KNR-mut oqarpoq.
- Soorunami ajornakusoorsimavoq iligiinnik toqqaaniarnermi kikkut suleqatigiilluarsinneraanerat nalilersoratsigu. Pikkorissorpassuit toqqagaanngillat neriuppungali pimoorullugu sungiusaannavissasut pisussami allami toqqarneqarsinnaanissamut periarfissaqarsinnaajumallutik, Ole Martinsen oqarpoq.
Unammisassat pikkorilluinnartut
Iligiit katitigaanerat inissinneqarpoq kalaallit unammisartut Kroatiami unammisassaasa kikkuunerat najoqqutaralugu.
Kalaallit siulliullugit junip 18-at unammissavaat Ukraine. Taakku nunarsuarmi futsalimi nunarsuarmi kakkannerpaat allassimaffianni normu 13-tut inissisimapput. Tullianillu unammissavaat Kroatia maanna kakkanerpaat allassimaffianni normu 43-tut inissisimasoq.
- Unammisassavut pinngitsooratik misilittagaqarluarput ukiup ingerlanerani amerlasooriarlutik unammisarnissamut periarfissaqarlutik. Maannakkut naatsorsuuteqarnissaq nalunarpoq qularnanngilarli pikkorilluinnartunut unammisussanngortugut, Ole Martinsen oqarpoq.
Arnat nunanut allanut unammisartut Nuummi katersuutereerunik sivikitsumik Danmarkimeeriarlutik Kroatiamut ingerlaqqissapput.
Puljep aappaaniipput Tjekkit, Polen aamma Marokko.
