Arnaq 28-nik ukiulik pineqaatissinneqarsimasunut inissiisarfimmiittussanngortinneqartoq

Eqqartuussisoqarfik Sermersuup arnaq 26-nik ukiulik toqutsisimasutut marsip ulluisa 17-ianni eqqartuuppaa, pineqaatissinneqarsimasunullu ukiuni arfineq pingasuni inissiisarfimmiittussanngortillugu.

Kalaallit Nunaanni Politiit tusagassiuutinut nalunaarummi allapput.

Tasiilami politiit juunip 26-anni nalunaarfigineqarput savimmik kapisisoqarsimasinnaasumik. 

Arnap anaanani kapisimallugu nalunaarutiginnittumut tassani oqaatigaa. Politiillu pinerluffiusumut ornigutsinneqarput arnarlu 26-nik ukiulik tigusaralugu. Pinerluffimmi pinerlineqartoq aamma siumorneqarpoq.

Pinerlineqartoq napparsimmaviliaanneqarpoq, arnalli savimmik kapoorneqangaatsiarsimanera pissutigalugu inuunera annaanneqarsinnaasimanngilaq.

Kalaallit Nunaanni Politiit nalunaarummi allapput.

Unnerluussisussaatitaasut piumasaqaataat malinneqartoq

Anaanani savimmik amerlariaqaluni kapisimammagu toqutsineralu peqqarneeqimmat pineqaatissinneqarsimasunut inissiisarfimmiittussanngortitsisoqarpoq.

Arnap 26-nik ukiullip eqqartuussummik suliareqqitassanngortitsinissamik eqqarsarfeqarnissaani piumasaraa.

Tamannalu unnerluussisussaatitaasunit akuerineqarpoq.

Eqqartuussiviullu unnerluussisussaatitaasut piumasaqaataannik isumaqataanerat, unnerluussisussaatitaasup Thomas Voergaardip naammagisimaarpaa.

- Eqqartuussiviup unnerluunneqartumik eqqartuussinera naammagisimaarpara. Politiit ajunngilluinnartumik suliaqarput, taamaalilluni suliami pitsaasunik uppernarsaatissaqartoqarluni, taanna oqarpoq nangillunilu:

- Aammattaaq unnerluussisussaatitaasut toqutsinerup sakkortuneranik nalilersuinerannut eqqartuussiviup isumaqataanera naammagisimaarpara, tamannami toqutsinermut nalinginnaasumik pineqaatissiissutaasartup ilaneqarneranik isumaqarmat.

Unnerluussisussaatitaasoq Thomas Voergaard tusagassiuutinut nalunaarummi taama oqarpoq.