Aputaasannerata sisorarluni pissartanngorniuttussat eqqorpai

Isumannaallisaaneq pingaartinneqarneruvoq inersimasut sangusaarissani pissartanngorniunnissaannut. Taamaattumik sangusaarissani pissartanngorniuttussat 15-init ukioqqortunerussanngillat meeqqat kisimik unammisinneqassammata.

Kalaallit Nunaanni sisorartartut kattuffianni sangusaarnermut ataatsimiititaliap Nuummi sisorarfiit sapaatip akunnera kingulleq naalersoq ataatsimeeqatigereerlugit ilungersimanartumik aalajangiipput.

- Kikkut tamarmik arajutsisimagunanngilaat aputaasannera. Taamaattumik aalajangerpugut sangusaarissanik pissartanngorniuttuni meeqqat kisimik unammisinneqassasut. Nuummi majuartaammi mikinermi meeqqat unammisinneqarsinnaapput majuartaammili anginermi inersimasut unamminissaannut aput naammatsinnavianngilaq, sangusaarnermut ataatsimiititaliami siulitaasoq Kale Mølgaard KNR-imut oqarpoq.

Nuummi sangusaartartut peqatigiiffii NS-84 aamma Nuuk Ski Club pissartanngorniunnissanik ukioq manna aaqqissuisuupput.

Meeqqat taamaatinneqassanngillat

Meeqqat pissartanngorniunnissaat unitsinneqassanngitsoq nalilersuinermi pingaartinneqarpoq.

- Eqqaamasakka malillugit 1990-kkut naalerneranniunnguatsiarpoq pissartanngorniunnerit marluk taamaatinneqarput. Meerarpaalussuit sangusaarnermiit timersuutinut allanut taamani annaavagut. Taamaattumik pingaartissimavarput meeqqat unamminissaasa taamaatinneqannginnissaa, Kale Mølgaard oqarpoq.

Ukioqqortunerni sangusaartartut sisunerminni sukkangaatsiartarput. Suli apinerugaluarpalluunniit sillimaniarnermut maleruaqqusaqarpoq avaqqunneqarsinnaanngitsunik.

- Inersimasut unammisinnissaat ulorianarpallaarpoq. Aput amigarpoq sisuffissaallu amippallaarluni. Apinerussagaluarpalluunniit qaammatip ataatsip iluani naammatsinnavianngilaq. Unammiffiup silissusissaa pillugu maleruaqqusaqarpoq avaqqussinnaanngisatsinnik, Kale Mølgaard oqarpoq.

Sisoraatinik oqilaniunnermi aamma Nuummi pissartanngorniuttoqartussaavoq. Aaqqissuisut NUP KNR-imut ilisimatitsipput sisoraatinik oqilaniunnermi Nunatsinni pissartanngorniunnerit pilersaarutaasutut poorskip nalaani piumaartut.

Aaqqissuussat apummik pisariaqartitsisut allat pilersaarutit malillugit piumaarput. Avannaata Qimussersua marsip 28-anni piumaarpoq taamatullu nunarsuarmi sisoqqannerit sakkortunersaat Arctic Circle Race sapaatip akunnerata naanerani tassani piumaarluni.