Ukioq issaasattoq: Aputaasannera sikuniaasaarneralu Avannaata Qimussersuani ernumaammersitsivoq

Danmarkimi apersuarluni angallanneq isasooqqajaasoq Nunatta avannaani apinissaa sikunissaalu kissaatigineqarput.

Tunngaviusoq tassaavoq; Avannaata Qimussersuani Qasigiannguani sukkaniunnissamut qaammat sinnilaaginnarlugu amigaataalerpoq. Anngunniuttarfiit ilaanni soorlu Upernaviup Uummannallu eqqaanni sikukkut sukkaniuttoqartarpoq. Sikuli pisariaqartinneqartoq suli amigaataavoq.

- Avannaata Qimussersuanik Qasigiannguani aaqqissuisut qanimut attavigiuarpagut aamma sulinerput ingerlavoq pilersaarutaareersutut qimussimik sukkaniunnersuaq arfininngornermi marsip 28-anni pissasoq, Kalaallit Nunaanni Qimussertartut Kattuffianni KNQK-mi siulittaasoq Mikkel Jeremiassen KNR-imut oqarpoq.

- Kisianni aamma isertussanngilara apriilip aallartilaaneranut kinguartitsisinnaaneq eqqarsaartigalugu nipituumik eqqarsarluta aallartereerluta, Mikkel Jeremiassen oqarpoq.

Kinguartitsinerli kinguneqarsinnaavoq. Qimminik assartuinerup ilarujussua Air Greenlandip timmisartuutaanik Dash 8-nik pisussaavoq. Marsip 28-anni sukkaniunnissamut timmisartussaqarneq timmisartumilu aquttussaqarneq qulakkeerneqareerpoq.

Kinguartitsinerup kinguneri

- Avannaata Qimussersuata kinguninngua poorskertussaavoq piffissamilu tassani angallattoqangaatsiartarmat Air Greenlandip timmmisartuussinnaanavianngilaatigut. Taamaattumik kinguartitsissagutta apriilip aallartisimalerneranut kinguartitsisariaqarsinnaavugut, Mikkel Jeremiassen oqarpoq.

Angunniuffiusuni qimussit pingasut annguttassapput. Tamanna KNQK-mi ataatsimeersuarnermi aalajangiussaavoq. Saqqaq-Qeqertaq, Qeqertarsuaq, Ilulissat, Qasigiannguit aamma Sisimiut nunakkut anngunniuffiusaramik sikumik  isumalluuteqarfiunngillat.

Taamaattoq Upernaviup Uummannallu eqqaamiu Avannaata Qimussersuani angusarissaartaqisut anngunniunnermi immap sikuanik pisariaqartitsipput.

- Ilungersuutigaarput sapinngisamik amerlasuut peqataatinnissaat. Uummannap eqqaani issilernissaa ilimasaarutaavoq issip ammut 20 angusussanngorlugu. Neriuppugut anngunniuffigissallugu isumannaatsumik sikujumaartoq, Mikkel Jeremiassen oqarpoq.