Kangaatsiami atuarfik: Angajoqqaat nakuusertoqartarneranik killissamillu qaangiiffiginnittarneq pillugu oqariartuuteqartut

Angajoqqaat eqimattat allagaqarnerminni oqartussanit ikiorneqaqqupput.

Allattoq Markus Valentin, Irene Jeppson, Paarnannguaq Nielsen

maajip 11-at 2026 07:46

Nutserisoq Connie Fontain

Kangaatsiap Atuarfiani Iparartarfimmi angajoqqaat sisamat siorna novembarip aqqarnanni allagaqarput.

Angajoqqaat allakkaminni ilinniartitsisut pingasut meeqqaminnut kinguaassiutitigut qanoq naapertuilluanngitsuliorsimanerat, nakuusersimanerat malersuisimanerillu nassuiaatigaat.

- Ajoraluartumik pisut tamakku kingunerinik sivitsortumik aammalu kingullertigut meeqqat atuarnissaminnut toqqissisimajunnaaqqapput, atuarusuttaratik, iliuuserineqarsimasunullu kingunerlutsitseqqallutik – misigissutsikkut namminneq aqukkuminaatsitaminnik, allakkami allassimavoq.

Angajoqqaat ajornartorsiutaasut oqartussanit iliuuseqarfigineqanngitsutut misigisimagamik tusagassiuutit maanna aqqutigalugit oqaatigaat.

Taamaammat inuit kinaassusaat isertuunneqartut

KNR-ip suliap ilungersunarnera, nunaqarfiup angissusaa eqqugaasullu atugaat eqqarsaatigalugit suliami ilaasut kinaassusaat sapinngisamik paasiuminaallisarpai.

Aaqqissuisoqarfiup angajoqqaat, meeqqat, inuit oqartussaasut kiisalu unnerluutigineqartut aqqi ilisimavai.

Kinguaassiuutitigut naapertuilluanngitsuliornerit

Angajoqqaat ilaata ilinniartitsisup ataatsip meeqqaminut; meeqqanullu allanut kinguaassiuutitigut qanoq naapertuilluanngitsuliorsimanera nassuiaatigaat.

Angajoqqaat oqarnerat naapertorlugu ilinniartitsisup meeraq assilisaarniarlugu atisaajaqqusimavaa killissamillu qaangiisumik nuanninngitsunillu oqaluffigalugu.

Ilinniartitsisoq tamatuma kingorna piaaraluni oqalunnerarsimavoq.

Tamanna meeqqap angajoqqaavi meeraq ilinniartitsisumut illersorniarlugu tassunga atuarteqqinniarnagu aalajangernerannik kinguneqarpoq.

KNR ukkatarinnittoq: Kangaatsiap Atuarfia Iparartarfik

KNR-ip meeqqanut killissamik qaangiisumik pissusilersuutit, kinguaassiuutitigut naapertuilluannginnerit nakuusernerillu pillugit oqaluttuat arlallit piffissami tulliuttumi saqqummiutissavai.

Oqaluttuat tamarmik Kangaatsiap Atuarfiani Iparartarfimmi angajoqqaanit meeqqaniillu oqaluttuarineqarput.

Illit imaluunniit nalunngisavit arlaat meeqqat atuarfianni assingusumik nalaataqarsimaguit redaktion@knr.gl-imut attaveqarnissannut tikilluaqqusaavutit.

Kisimiittutut misigisimaguit oqaloqateqarnissannillu pisariaqartitsiguit Tusaanngamut attaveqarsinnaajuaannarputit.

Oqarasuaatikkut siunnersuisarneq tassaavoq kinaassutsimik isertuussilluni illit siunnersuisullu akornassinni inuttut oqaloqatigiinneq, tassani oqaloqatigiinnerup imaa illit aalajangissavat.

Meeqqat, inuusuttut inersimasullu tamarmik oqaloqateqarnissamik allaqateqarnissamilluunniit pisariaqartitsisut Tusaannga attavigisinnaavaat. Tusaanngamut attaveqarneq kinaassutsimik isertuussisinnaaffiuutigaluni akeqanngilaq – aamma Tusassit imaqanngikkaluarpalluunniit sianersinnaavutit.

Oqarasuaat: 80 11 80

SMS: 1899

Angajoqqaat allat ilinniartitsisoq meeqqamut allamut annersaasarsimasoq oqaatigaat.

Angajoqqaat ilinniartitsisoq suliat pillugit politiinut unnerluutigisimagitsik allakkami allappaat.

Kalaallit Nunaanni Politiit ilinniartitsisup decembarip aqqarnanni unnerluutigineqarnera tigusimagitsik uppernarsaraat KNR-ip takuaa. Politiit suliaq misissuiffigigitsik uppernarsaammi allappaat.

Kulturitoqaq

Angajoqqaat ilinniartitsisumik allamik, atuarfimmi ukiorpassuarni sulisimasumik aamma isornartorsiuipput.

Angajoqqaat allagaqartuusut ilinniartitsisoq qangatut ilinniartitseriuseqartutut assersuutigalugu KNR-imut oqaatigaa.

- Ilinniartitsisoq meeqqanut annersaasarpoq, nilliasarpoq, nikaginnittumillu oqaluttarluni. Pineqartoq meeqqat akornanni toqqissisimanngitsitsivoq, anaanaasoq oqarpoq.

Taassuma oqarnera naapertorlugu tamanna atuartut arlallit atugarissaarnerannut sunniuteqarpoq.

- Meeqqat arlallit atuariartornissaminnut kajumissuseqanngillat. Atuarfiup iliuuseqannginnera paasiuminaatsipparput, taanna oqarpoq.

Angajoqqaap allap atuartitseriaatsip pisoqalisimasup suli atorneqarsinnaanera aamma paasiuminaatsippaa.

- Ilinniartitsisut uagut atuarnitta nalaanni ilinniartitsisuusut pissusilersuutaat taama sakkortutigitillugit suli ilinniartitsinerat eqqarsarnartoqartippara, angajoqqaaq oqarpoq, nangillunilu:

- Ilinniartitsisut taamaattut sumiiffinni allani taama iliortarsimagunik erngertumik soraarsinneqartariaqarput. Ilinniartitsisuuginnarnissaat isumassaqanngilaq.

Atuarfiup pisortaa

Angajoqqaat eqimattat atuarfiup pisortaa ilinniartitsisoq alla pillugu 2024-p naanerani ataatsimeeqatigisimagitsik oqaatigaat.

Taakkuli iliuuseqartoqarsorinngilaat, ilinniartitsisumiillu misigisat ingerlatiinnaqqinneqarlutik.

Angajoqqaat ilinniartitsisup angajoqqaat ilaasa meeraannut meeqqallu atuaqataanut annersitsisimanera kusananngitsumillu oqalussimanera pissutigalugu saaffiginneqqinniarlutik aalajangerput.

Angajoqqaallu oqarnerat naapertorlugu iliuuseqartoqanngilaq.

KNR-ip atuarfiup pisortaa pasilliutigineqartunut atatillugu oqaaseqartinniarlugu attavigaa. Pisortalli suliat oqaaseqarfigiumanngilaat.

Ikiortissarsiortut

Angajoqqaat allakkaminni atuarfimmi angajoqqaat ilinniartitsisunit nalaattagaannik misissuisoqalernissaanik kaammattuuteqarput.

- Meerartagut eqqarsaatigalugit kamaqartorujunngornikuupput atuarfimmi nikanarsagaasarnerat annertummat, angajoqqaat allapput, nangillutillu:

- Qanorli meeqqat allat angajoqqaallu nipangeqqaannartut eqqarsaatigalugit, aammalu nalunngilara saaffissaaruttunik allanik peqartoq.

KNR-ip Kalaallit Nunaanni Politiit attaveqarfigai. Taakku suliat ataasiakkaat oqaaseqarfigisinnaannginnamikkit oqaaseqarumanngillat.

KNR-ip meeqqat atuarfianni atuartuutilinnit oqaluttuat annikitsortallit ulluni tulliuttuni saqqummiuttassavai.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.