Andreas Mogensen nunatsinnukassasoq

Nunarput avataarsuanit tikeraartoqangajalerpoq. Danskimmi avataarsualiartartuat, Andreas Mogensen qaammatip tulliani nunatsinnut aqqusaassaaq.

Folketingimut ilaasortaq, Inuit Ataqatigiinneersoq, Aaja Chemnitz Facebookikkut quppernermi taama allaaserisaqarpoq.

Andreas ungaserujussuanngitsumi siullerpaamik Nunatsinnukassaaq nunarpullu pinnersorsuaq misigissallugu, Aaja Chemnitz allappoq, tassanilu avataarsualiartartoq kiisalu danskit ilinniartitaanermut ilisimatusarnermullu ministeriat, Christina Egelund assiliseqatiginerat assitaliussimavaa.

Aaja Chemnitzip avataarsualiartartoq Ilinniartitaanermut ministereqarnerfimmi ippassaammat naapissimallugu KNR-imut oqaatigaa.

Taassuma avataarsualiartartoq nunatta erfalasuanik avataarsuanukaassisimaneranik ilaatigut qulassuteqarfigaa. Andreas Mogensenimi avataarsuaniilluni toqqaannartumik apersorneqaraangami Erfalasorput, danskit erfalasuat savalimmiormiullu erfalasuat tunuliaqutarisarai takuneqartarpoq.

Andreas Mogensenip tikeraarnissani nammineq suli uppernarsanngilai, kisianni juuninngooq 16-ianit 28-anut illoqarfiit sumiiffiillu assigiinngitsut tikeraarniarpai.

Aasianni inuiattut ullorsiussasoq

Kommune Qeqertalik Aasiaallu tikeraagassaanut ilaapput, borgmesterillu Ane Hansenip (IA) tikeraarnissaanut pilersaarutit uppernarsarpai.

- Qilanaarpugut, borgmesteri nuannaarluni KNR-imut oqarpoq, Kommune Qeqertalillu avataarsualiartartup tikeraarnissaanut pingaaruteqarsimasoq oqaatigalugu:

- Nunamut eqqissisimatitamut illersuisoorusunnersoq aperaarput, tamannalu akueraa. Taamaammat maanna tikeraassaaq, taanna oqarpoq.

Ane Hansenip Andreas Mogensen juunip 21-anni inuiattut ullorsiornermi Aasianniinnissaa oqaatigaa, tassungalu atatillugu kulturikkut aaqqissuussinerit assigiinngitsut aaqqissuunneqarniartut oqaatigalugu.

Andreas Mogensen europamiut avataarsualiartitsisartuini ESA-mi sulisarpoq, taannalu ukiup affaani avataarsuarmeereerluni marsip ulluisa aqqarnani angerlaqqippoq. Avataarsualiartartoq aappassaa nunat tamalaat avataarsuani misissuisarfianni ISS-imiippoq.

Angalanermilu kingullermi Crew 7-inut ilaavoq, tassanilu ilisimatuussutsikkut misissuinerit assigiinngitsut pingaarnertut suliassarai.

Andreas Mogensen Danmarkimi sumiiffiit illoqarfiillu assigiinngitsorpassuit angalaarfigalugit avataarsuaniinnerminik saqqummiiartoqattaarpoq.