Aliasuuteqartunut siunnersortitut ilinniartut siulliit 13-it naammassipput
Soraarummeertut ilagaat Nuummeersoq Aviaja Rohmann Hansen. Taanna palasitut ilinniakkaminik 2005-imi naammassivoq, 2006-imiillu – nammineq suliniuteqarnermigut akissarsiaqaatiginagulu – meeqqanut aliasunnerup suliarinissaa pillugu suleqatigiiffissaannik ingerlatsisuullunilu pilersitsivoq. Meeqqanik inuusuttunillu annaasaqarsimasunik manna oqaloqateqartarpoq.
- Inuit suliffeqarfinniit allaneersut naapillugit nuannerpoq, suliffimminnilu toqusoqarsimatillugu ajornartorsiutigisartagaat misilittagaallu tusarlugit. Ilinniarnitsinni sammisat amerlasoorpassuit oqaloqatigiissutigaavut, allallu ajornartorsiornerit suut misigisarneraat paasisaqarnerulerluta, taanna oqarpoq.
Ilinniakkami sumorpiaq atorniarneraa aperineqarami Aviaja Rohmann Hansen akivoq:
- Suleqatitaakka ilinniakkamik massuminnga ilinniarnissaannut kaammattungaassavakka. Palasitummi sulilerlaajulluni sakkussat pingaarutillit pigisariallit tassani ilinniarneqarsinnaapput, taanna oqarpoq.
Ilisimatusarfiup Peqqissaanermik Pinngortitamillu Ilisimatusarfiata aamma Det Nationale Sorgcenterip qanimut suleqatiginerisigut aliasuuteqartunut siunnersortitut ilinniagaq ineriartortinneqarlunilu nunatsinni pissutsinut tulluarsagaavoq.
Moduli suliassaqarfinni naleqquttuni ilinniartunut, peruluttut qanigisaannik aamma toqukkut qimagaasunik siunnersuisarnermi piginnaasaminnik ineriartortitseeqqikkusuttunut ilinniarfiuvoq.
