Naalakkersuisut: Akunnaami imeq qalaqqaarlugu atorneqassaaq
Naqqiut: Siusinnerusukkut KNR allagaqarpoq, qalassinermi siunnersuut Nanortalimmi atuuttoq. Tamanna peqqutigaa Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmiit tusagassiutinut nalunaarut kukkusoq tigusimagatsigut. Tusagassiutinut nalunaarut eqqortoq naapertorlugu maanna nutaarsiassaq naqqillugu, taannalu Akunnaaq pillugu tunngassuteqarpoq.
Akunnaami imeqarfik juulip qaammataani misissorneqartoq uppernarsarpaa colibakteriamik annertuallaamik imaqartoq. Taamaammat imeq imerneqartussaq tamakkiisumik qalaqqaarlugu imerneqassasoq.
Taamannak Nunalerinermut, Imminut Pilersornermut, Nukissiutinut Avatangiisinullu Naalakkersuisoqarfimmiit tusagassiutinut nalunaarutaanni allaqqavoq.
- Nukissiorfiit ajornartorsiut tamanna iluarsiniarlugu suliaqarput aamma imermik misissueqqissapput imeq iluarseqqinnissaa qularnaarniarlugu. taama allagaqarput.
Misissuinerit nutaat akissutissiiffigineqarnissaata tungaanut innersussat atuukkumaarput.
