Akerliussutsimik takutitsinermi aaqqissuussisoq: Qinikkagut nipaappallaarput

- Piffissaq sivisooq ernumassutit assigiinngitsut pillugit uangalu nammineerlunga sininnaviissutigisartakkakka eqqarsaatigigakkit akerliussutsimik takutitsineq aallartinnikuuarput. Uagut iliuuseqanngikkutta allanik iliuuseqartussaqanngimmat.

Bolethe Hendriksen KNR-imut apriilip 14-ianni taama oqarpoq. Taanna Aasianni raajaleriffiup annanniarneranut atatillugu akerliussutsimik takutitsinernik marlunnik aaqqissueqataavoq.

Taassumami politikerit innuttaasunut naammattumik paasissutissiisimanngissorai.

- Oqartussaniit, kommunimiit, naalakkersuisuniit, inatsisartuniillu annerusumik oqariartuuteqartoqanngilaq nassuiaanertalimmik qanorlu pilersaaruteqartoqarneranik takutitsivigineqanngilagut.

- Uanga isumaqarpunga nammineerlunga qinikkagut nipaappallaarujussuartut. Iliuuseqartussat utaqqivagut. Kiisa ullumikkut ullut qassit qaangiuppat akerliussutsimik takutitsigattali, suli annerusumik tusagaqanngilagut.

Taassuma aaqqiissuteqartoqarnissaanut atatillugu suaaruteqarnissamut atatillugu innuttaasut pingajussaannik akerliussutsimik takutitsinissaannik aaqqiissuussinissaq maanna isumaliutersuutigaa.

Illoqarfik kinguariartortoq

Bolethe Hendriksenip Aasianni innuttaasutut illoqarfiup ineriartornermit kinguariartornermiilernera nammineq misigisimavaa.

Taassuma ernisarfimmik, iffiorfimmik, Tusassimik matusinerit kiisalu piffissat ilaannaani kigutilerisoqartarnera assersuutitut taavai.

Sulisitsisut immikkoortortaqarfik Diskomi siulittaasuata, Søren Hansenip suliffeqarfiit Aasianni aningaasaliinissaminnut tunuarsimaaleqqasut KNR-imut oqaatigaa.

Bolethe Hendriksenip oqarnera naapertorlugu sulisunut inissianik nutaanik 30-nik sanaartorneq sumiiffimmilu suliffeqarfiit arlallit allilerneqarnissaat iluarsartuunneqarnissaallu unitsinneqarallarput.

- Fabrikkerput matussagaluarpat suliffeqarfiit Aasianni ineriartortitsisut suliffissaqartitsisut nalunaaruteqarnikuupput sulisuminnik ikilisaassallutik. Ilaat allaat ima nalunaaruteqarlutik siullermik sulisut affaannanngorteriarlugit suliffeqarfiup matuneranik kinguneqarsinnaalluni. 

Bolethe Hendriksenip Aasianni suliffeqarfiit kisimik sulisuminnik soraarsitsinissaat kisiat ernumassutiginngilaa. Tamanna suliffeqarfinnut allanut kommunimi aningaasaliisimasunut ineriartortitseqataasimasunullu aamma siaruaassinnaavoq.

- Taamaammat taakkua annaanissaanut aarleqquteqarpugut, aarlerinartorujussuarmillu ernumanartorujussuarmik siunissamik ornitaqarluta. 

Polar Seafoodimut ajornartorsiutaasoq

KNR-ip tusarfiit imminnut attuumassuteqanngitsut sisamat oqaloqatigai, taakku kilisaat namminersortoq anginerpaaq Polar Seafoodimut raajanik tunisisarnerminik unitsitsisimasoq oqaatigaat.

KNR-illi tamanna sumik pissuteqarnersoq uppernarsarsinnaanngilaa.

Bolethe Hendriksenip aalisariutit raajarniartartut arlallit Aasiannut tunisisartut tunitsiveqarfinnut allanut tunisisariaqarsimasut oqaatigaa.

Taassuma oqarnera naapertorlugu tamanna kiffartuussinerup; ilaatigut naammaginanngitsutut aamma arriippallaartutut misigineqartup ilungersunarneranik pissuteqarpoq.

- Taanna aamma ajuusaarnartorujussuuvoq innuttaaqatigiinni uagut akisussaaffimmik tigusinissarput piaarnerusumik aamma iliuuseqarfigisariaqarlugu, Bolethe Hendriksen oqarpoq.

- Taassumalu saniatigut uanga isumanni Kommune Qeqertalimmi oqartussaniilluunniit suleqatiserinninneq maani Aasianni kivitseqatigiinnissamik pilersitsinissamik imaqartoq piaartumik aamma taanna ujartorneqarnissaa pilersinneqarnissaalu kissaatiginartorujussuuvoq.

KNR-ip Polar Seafood apersorniarsaralugu attaveqarfiginiarsaraa. Tamannali suli periarfissaanani.

Oqartussat nipaatsut

Bolethe Hendriksenip innuttaasut politikerinit tunitsivimmiillu susoqarneranik paasitinneqarnerunissaat maanna kissaatigaa.

- Naalakkersuisut siulittaasuata Jens-Frederik Nielsenip (D) aalisarnermut inatsit tusarniutitut saqqummiunneqaqqaarmat nipituumik oqaatigisaqattaarnikuuaa oqaluttarfimminngaanniit aalisarnermut inatsit taama isikkoqartillugu Aasianni fabrikkip matunissaanik kinguneqarsinnaasoq, ullumikkut maqaasisorujussuuarput tusarusunnartorujussuullunilu ullumikkut qanoq isumaqarnersoq.

KNR-ip Jens-Frederik Nielsen oqaaseqartinniaraluarpaa. Taassumali suliaq oqaaseqarfigerusunngilaa, taassumalu Aalisarnermut, Piniarnermut, Nunalerinermut Imminullu Pilersornermut naalakkersuisoq innersuussutigaa. 

KNR-ip naalakkersuisoq Peter Borg (D) saaffigaa. Taassumali saaffiginnissuterput suli uterfiginngilaa.