Aasiaat: Tunisassiorfik matunikuunngikkaluartoq aningaasaliisoqassaartoq

Aasianni Polar Seafoodip tunisassiorfiata matuneqaratarnissaanut atatillugu pissutsit ilungersunarput.

Taama Søren Hansen, Sulisitsisut Qeqertarsuup Tunuani immikkoortortaqarfianni siulittaasoq oqarpoq.

- Tunisassiorfimmut tunngatillugu qanoq pisoqarnissaa tamatta pissanganerluutigaarput, taanna oqarpoq.

- Sulisutta ukiup affaa qaangiuppat suliffeerussimassanerlutik isumakuluutigaat. Tamanna paasisinnaavara. Uangattaaq isumakuluppunga.

Suliffissaaleqineq siammasissumik eqquisoq

KNR-ip immikkoortortaqarfimmi siulittaasoq Aqqusinersuarmi illumi naapippaa. Illu umiarsualivimmut illoqarfiullu qeqqata tamangajaanut isikkiveqarpoq.

Søren Hansenip tunisassiorfimmi sulisut 115-it suliffeeruteratarsinnaasut kisiisa eqqarsaatiginngilai, aammali illoqarfik tamaat eqqarsaatigaa.

Suliffeqarfiit assigiinngitsorpassuit, soorlu sanasut ulluinnarnilu niuertarfiit, tunisassiorfik tunisassiorfiullu aningaasat inuiaqatigiinnut pilersitai pisariaqartippaat.

Søren Hansen, Sulisitsisut Qeqertarsuup Tunuani immikkoortortaqarfianni siulittaasuuvoq. Tunisassiorfiup siunissaanut tunngatillugu nalorninartoqarnerata kingunerisaanik Aasiaat aningaasaliisoqarumajunnaarnermik eqqugaanera taassumap oqaluttuaraa. Assi © : Markus Valentin / KNR

Sulisitsisut Peqatigiiffianni siulittaasup Aasianni innuttaasut 10 procentiisa tungaannut suliffeerunnissaat aarlerivaa.

Taamaattoqassappammi illoqarfik aatsaat taama inissisimanavianngilaq.

Suliffeqarfik 2005-imi kingullermik matuneqarmat inuit 300-t missaanniittut illoqarfimmit nuupput.

- Sapinngisamik taamaattoqaqqissanngilaq, Søren Hansen oqarpoq. 

Kinguneri takussaalereersut

Aasiammiut ullaat tamaasa suli suliartortarput. Nalorninartoqarnerali maanna kinguneqareerpoq.

- Suliffeqarfiit arlallit pissutsit maanna nalorninarnerat pissutigalugu, aningaasaliinerit unitsippaat, Søren Hansen oqaluttuarpoq.

Aningaasaliinerit Aasianni pisariaqartinneqartorujussuugaluarput, nunap immikkoortuani siulittaasoq isumaqarpoq.

Umiarsualiviullu nutarterneqartariaqavissornera immikkut eqqaavaa.

Søren Hansenip oqarnera naapertorlugu Aasiaat siunissaqassappat umiarsualivimmut aningaasaliisoqarnissaa pisariaqarluinnarpoq. Assi © : Markus Valentin / KNR

Søren Hansen illuminit talittarfimmut isikkiveqarpoq. Talittarfiup immamut ukiut ingerlanerini equgaluttuinnarnera illuminit takusinnaavaa.  

- Talittarfiup imaanut ullut ilaanni uertoornissaa ernummatigaara, taamaattoqassappallu nassiussassalerisinnaajunnaassaagut. Tamannalu pitsaavallaanngilaq.

Søren Hansenip oqarnera naapertorlugu, umiarsualivik nunatsinni umiarsualivinni aserfallatsaaliugassani kinguaattooqqanerpaavoq, 100 millionit koruunit missaannik kinguaattoorfiulluni.

- Kalaallit Nunaanni innuttaasut 30 procentii Aasiaat aqqutigalugu nassiussanik tikisitsisarput, taamaattumik umiarsualivik attaveqaatitut pingaaruteqarluinnarpoq. Nioqqutissat Qeqertarsuup Tunuanut Avannaanullu ingerlanneqarnissaannut umiarsualivitsinnut aningaasaliisoqarnissaa pisariaqartipparput.

Aasiaat ukiut qulit qaangiuppata qanoq isikkoqarnissaa sequnngerlutit takorloorukku, illoqarfik qanoq ittoq takorloorpiuk?

- Taava Qeqertarsuup Tunuani angallannermut qitiusumik nassiussanillu tigooraaveqarnissaa neriuutigaara aamma Ilulissat mittarfittaavanukariaannaajumaartugut.