Air Greenland timmisartumik alapernaarsuinissaq nutaaq pillugu isumaqatiginninniarfigineqartoq

Naalakkersuisut aamma Illersornissamut ministereqarfiup Air Greenland alapernaarsuinermut suliassanut atatillugu maanna isumaqatiginninniarfigaat.

Naalakkersuisut tusagassiuutinut nalunaarummi paasissutissiipput.

Illuatungeriit illersornissamut isumaqatigiissutip immikkoortuinit siulleq januaarimi isumaqatigiissutigaat.

Timmisartoq Challenger VL-604-soq maanna atuuttoq atorneqarunnaassasoq tassani isumaqatigiissutigineqarpoq.

- Challengerip pisinnaasai nungullarsimapput, aserfallatsaaliornera aningaasartuutaangaatsiarpoq ingerlatsinermilu ajoquteqakulalluni, Immikkoortumi siullermi allassimavoq.

Taamaammat inuinnaat ingerlatsisut maanna suleqatiginiarneqarput.

Isumaqatigiissut 2027-utinnagu piariissasoq

Isumaqatigiissutip immikkoortuani maannakkut suliassaasartut Air Greenlandimit suliarineqartalersinnaasut nassuiaatigineqarput.

- Illersornissaqarfiup timmisartuanit Challengerimit maanna suliarineqartartuni alapernaarsuinermi, nakkutilliinermi assartuinermilu piginnaasanik ineriartortitsisoqarnissaa pisariaqarpoq, Immikkoortumi siullermi allassimavoq.

Inuinnaat ingerlatsisut – maannalu Air Greenlandiusussaarpasilersup – suliassat nangissagai tamannalu kingusinnerpaamik 2027-rtinnagu pissasoq isumaqatigiissummi aalajangerneqarpoq.

Illuatungeriit timmisartut 2027 naatinnagu atuutilernissaat naatsorsuutigigitsik tusagassiuutinut nalunaarummi nassuiaatigaat.

Timmisartumik attartorneq

Danskit illersornissamut ministeriata Air Greenlandip timmisartuanik attartornissamut isumaqatigiissut isumaqatiginninniutigigitsik tusagassiuutinut nalunaarummi paasissutissiissutigaa.

- Issittumi Atlantikullu avannaanni taassumalu eqqaani alapernaarsuinermik suliassap pingaarutillip Illersornissaqarfiup suliarineqarsinnaanera pillugu Illersornissaqarfiup Air Greenlandimik attartornissamik isumaqatigiissuteqarsinnaanera, naammagisimaartupilussuuara, illersornissamut ministeri Troels Lund Poulsen.

Nunanut allanut naalakkersuisup, Vivian Motzfeldtip (S) isumaqatigiissut dual-use-imik tunngaveqartoq tusagassiuutinut nalunaarummi oqaatigaa.

- Air Greenlandip Issittumi alapernaarsuinermik annaassiniartarnermillu sulianut peqataaqataasinnaanera, Illersornissaqarfik suleqatigalugu civil dual-usemik naammassinnissinnaassutsimik suleqatigiinnermut atorneqarsinnaasumik takutitsisuuvoq, Vivian Motzfeldt allappoq.