Ukiaanerani ataatsimiinnerni sapaatip akunnerani siullermi oqallinnerit naammassipput.  

Takornarissat peqqinnissaqarfinnukartarnerat erngullu nukinganik nukissiorfiit atorluarneqarnerisa sivittorneqarnissaat ilaatigut oqallisigineqarput.  

Ataasinngornermilu oqallinneq ikerinnakkut unitsinneqarpoq, tassani Naleqqameersup Aki-Mathilda Høegh-Damip Inuillu Ataqatigiinneersup Ane Hansenip oqaaserisaat sakkortusivallaaqimmata.  

Innuttaasut inuuniarnerup tungaatigut aningaasartuutikinnerulersinniarlugit, imeruersaatit puukuisa akitsuusersorneqartarunnaarnissaat aamma aatsitassarsiornermut tunngatillugu nuna tamakkerlugu malittarisassaqartoqqassanersoq sisamanngormat oqallisigineqarput.

Tamanna naatsumik eqikkaaneq ugguuna atuarneqarsinnaavoq. Atuarluarisi.  

Aatsitassarsiornermut tunngatillugu malittarisassat

Naleraq aatsitassarsiornermut tunngatillugu nuna tamakkerlugu malittarisassaqartoqassanersoq, assersuutigalugu aatsitassarsiorfimmi silaannarissarfinnut teknikkikkut piumasaqaatinik, aatsitassarsiorfiup sulluliartaata iigartaasa qajannaassusaannik isumannaallisaanikkullu piumasaqaatinik imaqartoq sisamanngormat siunnersuuteqarpoq.  

- Tamanna patsiseqarpoq Kalaallit Nunaat nuna aatsitassarsiorfeqavittutut tunngaviusumik ilisimasassanik pisariaqartunik, soorlu aatsitassarsiorfinni teknikkikkut piumasaqaatinik ilisimanneriinnginnami, siunnersuuteqartoq Juno Berthelsen (N) oqaluttarfimmiit oqarpoq, nunallu allat isumassarsiorfigineqarnissaat siunnersuutigalugu.

Taassuma oqarneratut, nunat allat aatsitassarsiornermut tunngatillugu ataatsimut malittarisassaqarput. Aatsitassanut naalakkersuisup, Múte B. Egedep ersarissunik malittarisassaqarneq aatsitassarsiornerup iluani allaffissornikkut suliffissuaqarnikkullu iluaqutissartaqassasoq isumaqatigaa.

- Suliffissuaq piumasaqaatigineqartussanik siumut naleqqussarsinnaassaaq, Múte B. Egede (IA) oqarpoq:

- Aatsitassarsiornernut tamanut malittarisassat assigiilerpata, allaffissornikkut aalajangersarneqareersut iluanni immikkut ittunik ilisimasaqartoqarnerulissaaq.

Siunnersuut ataatsimiititaliamut suliakkiunneqarpoq.

Imeruersaatit puiinut akitsuut peerneqarli

Siumut Nalerarlu imeruersaatit puiinut akitsuutip peerneqarnissaanut sisamanngornermi siunnersuuteqarput.

Naleraq isumaqarpoq, imeruersaatit puuinut akitsuut piivinneqassasoq Siumullu kalaallit suliffeqarfiutaannut akitsuutip peerneqarnissaa siunnersuutigaa, suliffeqarfik nunatta avataani nioqqutissarsioraluarpalluunniit.

- Akitsuutip nalinginnaasumik inuussutissanut aningaasartuutit qaffappai. Akitsuut aaqqissuussaanermut attuumassuteqanngilaq. Innuttaasunik imeruersaatisisunut eqquivoq, Pele Broberg (N) oqaluttarfimmit oqarpoq.

Naalakkersuisulli isumaqarput, akitsuutip atorunnaarsinneqarnissaa suliffeqarfinnut iluaqutaanani innuttaasunut iluaqutaassanersoq maanna nalunarallartoq, imigassarlu akikinnerusoq imeruersaatillu sukkullit akikinnerusut, peqqinnissap tungaatigut ilungerunartorsiortitsinerulissanersut. 

Taamaattumik Naleqqap siunnersuutaa itigartinneqarpoq Siumullu siunnersuutaa ataatsimiititaliamut ingerlateqqinneqarluni.

Siunnersuutit eqqaaneqareersut saniatigut, Namminersorlutik Oqartussat suliffeqarfiutaat qanoq ingerlatseqatigiiffittut aaqqissuunneqartarnissaat pinngitsaaliissummillu taarsiissutitalimmik pigisanik piginnikkunnaarsitsinermi teknikkikkut periutsit sisamanngornermi aamma oqaluuserineqarput.