WWF angusanik naammarisimaarinnippoq, kisianni...

Issittumi Siunnersuisooqatigiit ataatsimiimmata siuariarnerit Pinngortitaq pillugu nunarsuaq tamakkerlugu suliniaqatigiiffimmit, WWF-imit, nuannaarutigineqarput, oqaluuserineqanngitsuugarpassuilli pakatsissutigalugit.

Allattoq Carla Davidsen

maajip 13-at 2011 08:53

- Pingaarutilinnik nuannersunillu siuariartoqarpoq, aap. Nunat pissaanilissuit issittumut soqutiginnikkiartuinnarput, tamannalu pingaaruteqarpoq pisariaqarlunilu, suliffissuaqarnermummi tunngasut aalajangiiffigisariaqarput. Avannaarsuanili pinngortitaq qajannartoq inuiaqatigiillu immeraassutigineqarput, Pinngortitaq pillugu nunarsuaq tamakkerlugu suliniaqatigiiffimmi silamut - nukissiuuteqarnermullu pisortaq, John Nordbo, oqarpoq.

Issittumi uuliasiorluni qillerinerni isumannaallisaanissamut suleqatigiissitaliortoqarpoq, Issittumi Siunnersuisooqatigiit qanoq inissisimassanersut taakku misissussavaat, arriippallaamilli ingerlavoq, WWF-imit isumaqarput.

- Uuliasiornermi ajutoortoqarnissaa pinngitsuunngivilluni pinaveersaartariaqarpoq. Pinngortitap qajannartup illersorneqarnissaa pillugu ataatsimoortumik inatsisiliortoqartariaqarpoq, John Nordbo oqarpoq.

Nunarsuatsinni silap kiatsikkiartornerata unammillernarnera Issittumi Siunnersuisooqatigiit maanna aamma eqqartunngitsoorpaat. Siunnersuisooqatigiit aalajangerput, tamanna nunarsuaq tamakkerlugu oqallisigisariaqartoq, Issittumi Siunnersuisooqatigiinniunngitsoq. Tamanna aamma WWF-ip pakatsissutigaa.

- Silap ajornartorsiutigineqarnera ministerit soqutiginngimmassuk pakatsinarpoq. Kingunerimi Issittumi ersarissorujussuupput. Gassit silaannarmik kissakkiartortitsisartut millisarneqarnissaannik pilersaarutit naammanngitsut, Siunnersuisooqatigiit nassuerutigisariaqarsimagaluarpaat, John Nordbo naggasiivoq, neriorsuillunilu Issittumi ineriartorneq WWF-ip malinnaavigiuassagaa.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.