VIDEO Martha Lund Olsenip siusinaartumik soraarnerussutisiallit sulisinnaassuseqartut sulilersikkusuppai

Tamannalu siusinaartumik soraarnerussutisiallit sulisinnaanngitsut akornanni ernumanermik pilersitsivoq. Ilaqutariinnermulli inatsisinillu atortitsinermut naalakkersuisup Martha Lund Olsenip taakku ernumaqqunagit eqqissisarpai.

- Tamakkiisumik sulisinnaanngissuseqaraanni, imaluunniit ima innarluuteqartigigaanni sulisinnaassuseq annikitsuulluni, taava ernumassutissaqanngillat.

- Ullumikkut takussutissaqarpoq siusinaartumik pensionisiaqartorpassuit annertungaatsiartumik saniatigut isertitaqartartut. Tassa imaappoq amerlangaatsiartut sulisinnaassuseqarput, Martha Lund Olsen KNR-imut taama oqarpoq.

Pitsaanngitsut naaffeqannginnerat kipineqassaaq
Kommunini sulisut arfineq-pingasunik ilaneqarnissaat innuttaasullu ataasiakkaat pikkorissartinneqartarnissaat pilersaarutaavoq. Aamma siusinaartumik soraarnerussutisiallit suliffiit pillugit suliffissaleqisunut unammillernissaat pineqanngilaq.

- Sulisinnaassuseqartut inuiaqatigiinnut akuulersinniarnissaat siunertaavoq. Upperaarput inunnut ataasiakkaanut ilaqutaannullu pitsaanerpaasoq suliffeqarluni orniguttarfeqaraanni.

AAMMA ATUARUK Siusinaartumik soraarnerussutisiallit Naalakkersuisut millionerpassuarnik sipaarniarfiginiarpaat

- Aamma ajoraluartumik takusinnaavarput siusinaartumik pensionisiaqartut ilaat angajoqqaavi aamma siusinaartumik pensionisiaqarsimasut, taamaammat kinguaariinnut peqqinnanngitsumik inuuneq atuutilersimalluni. Taamaammat tamakku tamaasa isigalugit isumaqarpugut pitsaassasoq, Martha Lund Olsen oqarpoq.

Taamatut siunnersuuteqarneq aappaagu 6,4 millionit koruuninik aningaasartuuteqarnerulersitsissaaq. 2016-imi aningaasartuutigineqartut 1,8 millionit koruuninik appartinneqarsimassapput 2017-imilu aningaasartuuteqarfiujunnaarluni. Naalakkersuisummi ukioq taanna 10 millionit koruunit pallillugit sipaaruteqarnissaq naatsorsuutigaat 2018-imilu sipaarutissat 18 millionit koruuninut taggillugit.