VIDEO Air Greenlandimi sulisup soraarsitaanini quarsaarutigaa

Ukiup nikinnerani suliunnaartussat ilagaat Steffen Enoksen Qaqortup Mittarfiani sulisuusoq.
 
- Soorunami qanoq-iliornissara nalulluinnarpara. Tusagaq soorunami alianarpoq, akiligassammi tamanna pillugu uninnavianngimmata, KNR-imut oqarpoq.

Mittarfiliortoqarnissaata pilluaatigineranit quarsaarnermut
Sulisut soraarsitsisoqarnissaa sioqqullugu nuannernerusumik tusagaqarput, tassami Naalakkersuisut Qaqortumi mittarfiliornissamut 2015-imut aningaasanut inatsimmi millionerpassuarnik immikkoortitsimmata.

- Illoqarfitta mittarfittaarnissaa tusaratsigu isumallualerpugut. Maannalu ullut marlussuit qaangiutiinnartut nikallortitaavugut.

AAMMA ATUARUK Soraarsitsisoqarnissaa piffissami sivisuumi ilisimaneqarpoq

- Quarsaaqaagummi. Allatut qanoq oqaatigissanerpara, Steffen Enoksen oqarpoq.

Illumik tunisinissaa ineriartornermit kigaallatsinneqarpoq
Suleqatini soraarsitaasut allat assingalugit illoqarfimmut allamut nuunnissamik neqeroorfigineqarsimavoq.

- Imaaliallaannarlunili illoqarfimmut allamut nuuttoqarsinnaanngilaq. Piffissamik sivikitsumik piffissalerneqarlunga nuussinnaavunga. Kisianni maani illoqaprugut. Illorput qanoq-iliussanerlugu naluarput. Aamma tunisinnaassanerlutigu naluarput. Pingaartumik ullutsinni.

- Kujataanimi ineriartortoqanngippat illu tunisinnaanngilarput.

- Soorunami allamik aqqutissarserusupput. Pissutsilli taama sukkatigisumik allanngornerini aaqqiissutissamik nassaaruminaappoq.