QAMANI-mik taallugu imminut toqunnermik pinaveersaartitsiniarluni suliniut utaqqineqarsimaqisoq naalakkersuisut sapaatiummat saqqummiuppaat.

Nunat tamalaat imminut toqunneq akiorniarlugu ullorititaat eqqorlugu tamanna pivoq .

Iliuusissatut pilersaarut 30-nik qupperneqartoq, ukiuni sisamani utaqqineqarsimavoq, kisianni sooq taama kingusinaarunneqartiginersoq, meeqqanut, inuusuttunut ilaqutariinnullu naalakkersuisumut, Aqqaluaq B. Egede-mut (IA) apeqqutigigaluaratsigu akisinnaanngilaa.

Tamaakkaluartoq, iliuusissatut pilersaarutip naammassinera nuannaarutigeqaa.

- Isumaqarpunga alloriarfissaq taanna pimoorussiniarnerlu pitsaasup tungaanut aallartiffeqartutut nalilerneqarsinnaasoq uani, oqarpoq.

Sooruna ukiut sisamat kingusinaarunneqartoq?

- Ukua naalakkersuisut siuliisa sooq taamatut aalajangertarsimanerat akissallugu tunuarsimaalaarpunga, oqarpoq.

Iliuusissatut pilersaarut 2028-p tungaanut sulinissanut tunngaviussaaq, taamaasillunilu pilersaarut 2019-imi atorunnaartoq taarsissallugu. Iliuusissat ilagissavaat, pinaveersaartitsinerup ataatsimoorullugu akisussaaffittut isigineqalernissa. Isumaginninnermut aqutsisoqarfik, kommunit aamma inoqarfiit assigiinngitsut suleqatigiillutik pinaveersaartitsinermik taamaasillutik suliaqalissapput.

Iliuusissatut pilersaarummi suliniutit assigiinngitsut piviusunngortinnissaannut akisussaaffik annerpaaq isumaginninnermut aqutsisoqarfimmiippoq, naalakkersuisuni aamma pinaveersaartitsinermik suliaqarfinni assigiinngitsuni. Akisussaaffik taanna siornatigut aalajangersimasumik inissinneqarnikuunngilaq.

Ataatsimuussasut

Kinaluunniit annikilliorloq, ajornaquteqanngitsumik ikiortissarsiorsinnaalernissaa, periusissiami QAMANI-mi immikkut pingaartillugu taaneqarpoq,

Tamanna tunngavigalugu imminut toqunnernik pinaveersaartitsinermik suliallit qitiusumik ataatsimoortinnissaat naalakkersuisut anguniarpaat. Taakkuussammata kikkunnilluunniit, psykologimik atorfissaqartitaqartunik, ikiuisinnaasut. Ikiugassallu kikkuusinnaappulluunniit - imminut toqunnissamik eqqarsaateqartut, ulorianartorsiortut imaluunniit qanigisaasut.

Imminut toqunnermik pinaveersaartitsilluni sulinermik qitiusumik allaffeqalernissaanik aalajangerneq ilaatigut MIO-p, inuusuttut ikiortissarsiornissamut tunuarsimaartarnerminnik oqaluttuaanik tunngaveqarpoq, taakku oqarmata ikiorsiinermik aaqqissuussaq tukappallaartoq.

- Isumaqarpunga saaffiginninnerup tungaatigut periarfissiinissat taavalu aamma qitiusumik ataatsimoorussamik ilisimasaqarluta suliamik ingerlatsisinnaanerput tassuuna nukittorsaaffigineqartoq. Akisussaaffik sumut tamaanga iliiorarnagu kisianni pitsaasumik aqunneqarnissaa tassuuna aamma periarfissinneqarami, taannalu aamma pisariaqartinneqarnikuulluni, isumaqarpunga taanna pitsaasuusoq suliap pitsaasumik ingerlannissaanut qitiusoqarfeqarnissaa, naalakkersuisoq Aqqaluaq B. Egede oqarpoq.

Nalunartoq qaqugu

Aqqaluaq B. Egedep periusissiaq naammassinera nuannaarutigigaluarlugu, qaqugu qitiusumik allaffik atulerumaarnersoq maannangaaaq oqaatigisinnaanngilaa, neriorsuutigaluguli sapinngisamik piaartumik aallartissinnaanissaa sulissutigiumaarlugu. Tamannalu kommunit tamaasa suleqatiginerisigut aatsaat pisinnaanerarpaa.

- Piffissaq sukkasuumik ingerlatissavarput aamma maannakkut kommunet peqatigalugit naalakkersuisut borgmesterillu ataatsimiinnerat utaqqimaalaaqqaarusuppara aamma kommunet assigiinngitsorujussuarmik suleriartaatsimikkut inissisimagamik aammalu inoqassutsimikkut aamma assigiinngisitaartorujussuullutik taamaammat taakkua peqatigalugit suliap ingerlannissaaa naalakkersuisuninngaanniit aalajangiusimavarput, oqarpoq.

- Kommunit qanimut suleqatiginissaat pisariaqarpoq, Aqqaluaq B. Egede naqissusiivoq.

Suummi tamarmik qitiusumik allaffimmiittariaqanngillat. Pilersaarusiamimi eqqaaneqartut ilagaat, suliniutit kommunini pioreersut ingerlaannaqqullugit tapersernerusariaqartut. 

Tapersersuineq pingaartuuvoq, inoqarfiit tamarmik psykologeqarlutillu psykiatereqanngimmata. Taamaattumik - ilinniarsimasuugaanni ilinniarsimasuunngikkaanniluunniit - pinaveersaartitsinermik suliaqarnermi ilisimasassat ikiugassaqarpallu periusissat quppersagaliarisariaqassasut pingaaruteqartutut taaneqarpoq.