Thulemi sulisartuusimasut pingasut ilungersortuarsinnarput

Foreningen for Strålingsramte Thulearbejdere (Thulemi sulisartuusimasut Qinngornernit ulorianartunit eqqugaasimasut Peqatigiiffiat) 1968-imi ajutoortoqarnerata kingunerisaanik peqqissutsimikkut innarlerneqarsimanertik pissutsigalugu taarsiiffigineqarnissaminnik suliniutigisarsimasaat tamarmik iluatsinngitsoorsimapput.

Taamaakkaluartoq danskit Thulemi sulisartuusimasut pingasut namminersuullugu piffissami sivitsortumi Pihl og Søn New Yorkimi isumaqatigiissitsiniarnikkut eqqartuussivikkut suliassanngortillugit misiliisarsimapput, Foreningen for Strålingsramte Thulearbejderemi siulittaasoq KNR-imut taama oqarpoq. Sulisartut pineqartut sisamaasimagaluarput, ataaserli kræftimik nappaateqarluni toqusimalluni. Taakku tamarmik kræftimik nappaateqarsimapput ataaserlu suli kræfterluni. Ataaseq toqqusaamigut kræfterpoq ilaalu marluk kræftimik nappaateqarnermik kingunerisaanik tartuersissimallutik.

Sulisartullu taakku suliassanngortissimasaat aallaavigalugu Amerikami suliffeqarnermut oqartussaasut Pihl og Sønip akiliisinnaajunnaarnermi pigisaanit 1,1 mia. koruuninik tunineqarnissamik piumasaqaateqarsimapput, Thulemi sulisartuusimasut taakku pingasut taarsiivigineqassagaluarpata allat taarsiivigineqarnissamik piumasaaqateqassagaluarpata tamatuma aningaasassaqartinneqarnissaa qulakkeerniarlugu.

Foreningen for Strålingsramte Thulearbejdere piumasaqaateqarnermut peqataanngilaq, taarsiivigineqarnissamillu ilungersuuteqarnini taamaatiinnarsimallugu.

-Ukiaq ataatsimeersuaratta peqatigiiffiup maleruaqqusai allanngortippagut, peqatigiiffik maanna periarfissaaruttutut nalileratsigu. Europami eqqartuussivinni tamani ajorsarpugut, ilaasortavulli ataasiakkaat nappaatigilersimasamik ajutoornermut atassuserneqarsinnaanerat nakorsanit uppernarsartissinnaallugu qularutiginngilaat, Jens Zinglersen oqarpoq.

Pihl og Sønip kuratoriata Berlingske Tidendemit apersorneqarluni Thulemi sulisartuusimasut piumasaaqataasa tusaaniarneqarnissaat tunuartivissunngilaa. Jens Zinglersenilli periarfissaat mikisuararsuusutut nalilierpai.

-Qularaara. Pihl og Søn taamani ajutoortoqarneranut pisuussuteqartutut isiginngilara. Akisussaaffik arlaanniissaappat immaqa Amerikap naalagaaffianut, amerikamiut sakkutuuinut imaluunniit amerikap silaannakkut sakkutooqarfianut inissinneqarsinnaavoq, atomimilli sakkussianik ajutoornerup kingunerisaanik napparsimalersimasunut amerikamiut tungaannit taarsiisoqarsimaneranik tusagaqarnikuunngilanga.

Pihl og Sønip akiliisinnaajunnaarnermi pigisai 600 mio. kr.-inik naleqartussatut naatsorsorneqarsimapput, taakkunanngalu Thulemi sulisartuusimasut taarsiivigineqarnissamik piumasaqaataat amerlanersaallutik.

Danskit Thulemi sulisartuusimasut tamarmik immikkut ajunngitsorsiassanik taasanik 50.000 koruuninik 1995-imi tunineqarput. Naalagaaffiulli ajutoortoqarneranut tunngatillugu taarsiissuteqarnissani akueriumasimanngilaa.