Steen Lynge: Naapertuilluarnerusumik aaqqiisoqartariaqaraluarpoq
- Aaqqiissutissap 2016-iminngaanniit siunissamullu atuuttussap allatut isikkoqarnissaa, suliassama tullerissavaat, Steen Lynge oqarpoq.
Tassalu nammineq paasinninnini naapertorlugu naapertuuttumik ingerlatsilernissaq unitsiinnarnianngilaa siunissamullu aaqqiissutissamut nassaarniassalluni.
- Kommuninut naligiissaarinissamut atatillugu, Naalakkersuisut suliassamik suliaqarmata aalajangiisussanngormatalu akerliullunga taasisimavunga, pissutigalugu nalimmassaarinissamik tunngavissagut paasissutissat tamakkiisumik piginnginnatsigit. Taamaattumik aamma naapertuilluartumik aalajangiisinnaanermut tunngavissaqannginnerput aallaavigalugu taasinermut uanga akerliusimavunga, Steen Lynge oqarpoq.
Qanoq ittumik aaqqissuussissanerlutik kommuunit isumaqatigiissutigisinnaanngimmassuk, Naalakkersuisut aalajangiuppaat Kommuneqarfik Sermersooq 2015-imi naligiissarinissamut 54 millionit koruuninik akiliinerussasoq.
Steen Lyngeli isumaqarpoq paasissutissat, kommunit nassiussaat, Naalakkersuisut aalajangernermut atugaat naammanngitsut.
- Tunngavilersuutit ilaatigut isumaqatiginarsinnaapput, kisianni aamma ilaqarput isumaqataananngitsunik, taamaattumik tunngavissiatut atorneqarsimasut aamma kissaatigineqarsimasut ilai isumaqatigisimanngilakka taavalu paasissutissanik kommuninit tamakkiisumik tunniussisoqarsimanani, Steen Lynge oqarpoq.
Aalajangiussat ataqqisariaqartut
Naalakkersuisuni aalajangiinermut akerliugaluarluni aammalu aalajangigaq Inatsisartuni atuuttussanngortinneqartussaagaluartoq, Naalakkersuisuni Inatsisartunilu aalajangiisarnerit Steen Lyngep toqqissisimanartippai.
- Isummagut immaqa tamatigut assigiinneq ajorput Inatsisartut kissaatigisaat anguniagaqaqqullutalu aalajangersimasunik aalajangiinerat. Kisianni taanna ataqqisariaqarpoq pissutigalugu oqartussaaqatigiinnerup taamatut aaqqissugaanera imminut illersorsinnaammat. Taanna uanga ataqqilluinnarpara. Taamaattumik massakkut naalakkersuisutut ilaasortaatitaanera periarfissatsialattut tigusimavara aamma akisussaaffiit suliakkiissutillu Inatsisartuninngaanneersut tamakkiisumik ataqqillugit suliniartarpunga, Naalakkersuisut siulittaasuata tullia Steen Lynge oqarpoq.
