Sara Olsvig: Danmark kisimiilluni nunanut allanut tunngasunut politikkeqarsinnaanngilaq
Olsvig naapertorlugu sulianut nunanut allanut tunngasunut Danmarkip Kalaallit Nunaat piaaraluni peqataatittanngikkaa, naak issittumut tunngasunut sunniuteqaraluartut.
Aviisimi Politikenimi qanittukkut ministerit marluk allaaserisaanni tamanna erserpoq.
Allaaserisami tassani Danmarkip nunarsuarmi suliniuterpassui eqqartorneqarput, kisiannili Kalaallit Nunaat Issittorluunniit oqaatsimik ataasinnguamilluunniit eqqaaneqarsimanngillat, Sara Olsvig uparuaavoq.
- Isumaliutersuummik atuartuulluni, ingammillu kalaaliulliuni, tamanna assut eqqumiiginarpoq. Naalagaaffeqatigiinneq pillugu eqqartuinissaq ajornarsinnaasarpoq paasisinnaasarparalu politikerit Nunatsinneersut Danmarkimeersullu naalagaaffeqatigiinnermut tunngasunik eqqartuinissartik tunuarsimaarfigigaangassuk. Nunanulli allanut politikkip qanoq innissaa pineqartillugu nalornisoqartussaanngikkaluarpoq.
Naalagaaffeqatigiinneq pingasunik immikkoortortaqarpoq
- Naalagaaffeqatigiinnerup malittarisassaa sananeqaatimigut pingasunik immikkoortortaqarpoq, nunallu taakkua pingasuullutik nunanut allanut, illersornermut sillimaniarnermullu politikkertik kattuppaat, Sara Olsvig allappoq.
Nunanulli allanut tunngasunut ministerip erseqqissarsimavaa, nunanut allanut tunngasunut politikki pillugu Kalaallit Nunaat oqaloqatigilluartarlugu.
Oqaloqatigiinnerli naammanngitsoq Inuit Ataqatigiit siulittaasuat isumaqarpoq, ujartorlugulu nunanut allanut tunngasunut politikki ersarissoq Kalaallit Nunaata akuuffigisaa, Ruslandip Ukrainillu aaqqiagiinnginnerinut tunngasut ilanngullugit.
