Risskovimi uninngasut qimaasarneri nipangiunneqarsimapput
Risskovimi uninngasut katsorsaavimmit 2012-imi qimaasimasut napparsimmavissuup nalunaarutigisaanit quleriaammik amerlanerususimasut decembarip qaammataani paasineqarpoq. Uninngasut qimaasimasut katillugit 27-iupput, paasissutissiissutigineqartutullu pingasuinnaanatik. Taakkunannga aqqanillit angerlanngitsoorsimapput - tassalu uninngasut ingiallorteqaratik aneereernermi kingorna isumaqatigiissutigineqartutut angerlanngitsoortut. Sinneri 15-it tassaasimapput uninngasut sulisut qimaasoorutigisaat imaluunniit parnaarussaaqqaffimminnit qimaasimasut.
Ilaatigut kalaaleq uninngasoq, aanaminik toqutsisimasutut pineqaatissinneqarsimasoq, oktobarip qaammataani novembarillu qaammataani qimaasivoq. Risskovimi sulisut aviisimut B.T-mut nassuiaapput, napparsimmavissuup pitsaanngitsumik oqaluuserineqarnissaa pinngitsoortinniarlugu uninngasut qimaasarneri pisortaqatigiit isertuuttarsimagaat.
Astrid Krag nassuiaasoqarnissaanik decembarip qaammataani noqqaavoq, Riskovillu aninermut malittarisassat sukaterniarlugit kiisalu avataaneersumik misissuisitsiniarluni neriorsuisimavoq.
Dansk Folkepartilli, isumasiuinissamut aggersaasup, tamanna naammaginartinngilaa. Partiip eqqartuussiveqarneq pillugu oqaaseqartartuata Peter Skaarupip ilaatigut paaserusuppaa, eqqunngitsumik paasissutissiisarneq qanoq sivisutigisumik atugaasimanersoq kiisalu ministeri qanoq iliorniarnersoq.
