Qaqortup mittarfittaarnissaa qanilleqqippoq
- Nunatta immikkoortuini allani mittarfeqarnikkut ineriartortitsimaneq assigalugu maani kujataani pineqarnissarput qanilliallammat qujanaqaaq, mannalu iluatsillugu Naalakkersuisut aamma Inatsisartut Aningaasaqarnermut Akileraartarnermullu Ataatsimiititaliaanni ilaasortat qutsavigalugillu nersualaarusuppakka, Jørgen Wæver Johansen, Kommune Kujallermi borgmesteri oqarpoq.
Qaqortup eqqaani mittarfiliassatut pilersaaruteqarfigineqartoq nunap immikkoortuani ineriartortitsinermut iluaqutaalertussaasoq Kommune Kujallermi borgmesterip qularutiginnginnerarpaa, tamatumali saniatigut aqqusinniassap sananeqalernisssaa kujataani suliffissaqartitsiniarnermut ukiumi matumani iluaqutaalereersussaammat tamanna aamma nuannaarutissaasoq, Jørgen Wæver Johansen-ip erseqqissaaatigaa, Kommune Kujalleq tusagassiorfinnut nalunaaruteqarluni taama allappoq.
Kommunip piareersaatit assigiinngitsut pilertortumik aallartinniarpai
- Suliffissaqarnerup tungaatigut periarfissaasinnaasut tamarmik atorluarneqarnissaat maani kujataani atorfissaqartilluinnarpavut, taamaattumik aqqusinniassaq ukioq una naatinnagu suliarineqalersussanngortoq kommunitsinnut ukiumi matumani aamma iluaqutaasussaammat nuannaarutigeqaarput, Kommune Kujallermi borgmesteri, Jørgen Wæver Johansen oqarpoq.
AAMMA ATUARUK Qaqortoq mittarfittaassaaq
- Mittarfiliassatut pilersaarutigineqartup tungaanut aqqusinniassap sananeqarluni aallartinneqarnissaa sapinngisamik pilertornerpaamik aallartinneqarsinnaaqqullugu piareersaatit assigiinngitsut sukkasuumik suliarineqarnissaat siunnerfigineqassasoq, Kommune Kujallermi inuussutissarsiutinik piorsaanermut pisortaq, Kenneth Høegh oqarpoq.
