Qalerallit anginerit qanoq pisarineqassappat?

KNAPKip aamma Royal Greenlandip aaqqissugaannik, Qeqertarsuup tunuani qalerallit pillugit Ilulissani ullumi isumasioqatigiittoqarpoq, tassani qalerallit aalisarneqariaasiat, angissusaat naleqarnerallu pillugit saqqummiisoqarpoq oqallittoqarlunilu. -Qeqertarsuup tunuani pisarineqartartut annertupput, kissaatigaarpullu aalisakkat pisarineqartartut anginerulernissaat, tamannami tunisassiornitsinnut aalisartumullu pissarsiaqaataanerussammat, Royal Greenlandimi piujuartitsinissaq pillugu sulisoq Lisbeth Schönnemann-Paul oqarpoq.

Allattoq Oline I. Olsen

maajip 09-at 2012 16:46

- Qeqertarsuup tunuani aalisakkanik annertuumik pisaqartoqartarpoq. Kissaatigaarpullu aalisakkat pisarineqartartut anginerulernissaat, takusinnaagatsigummi tamanna tunisassiornitsinnut aalisartumullu pissarsiaqaataanerussasoq, Royal Greenlandimi piujuaannartitsineq pillugu sulisoq Lisbeth Schönnemann Paul Ilulissani isumasioqatigiinnermi tunisassiorfiit soqutigisaat pillugu taama oqarpoq.

KNAPK aamma Royal Greenland suleqatigiillutik Ilulissani qalerallit pillugit isumasioqatigiisitsipput. Isumasioqatigiinnermi biologi Qeqertarsuup tunuani Uummannami Upernavimmilu qaleraleqassuseq aamma qalerallit pisarineqartartut angissusaat pillugit saqqummiivoq. Qeqertarsuup tunuani qalerallit pisarineqartartut agguaqatigiisillugu angissusaat milliartoraluartoq qaleraleqassuseq innarlerneqarnavianngitsoq oqaatigaa. Qalerallilli alliartulissappata qaleralittassat qaffaqqinneqannginnissaat oqaatigaa.

- Qalerallit allisinneqarnissaat anguniarlugu ukioq naallugu qaleralinniarunnaarsitsinissaq piviusorsiortuunngilaq, Qeqertarsuulli tunuani qalerallit alliartorniassappata, taava qaleralittassat qaffanneqaqattaartassanngillat, biologi Rasmus Nygaard oqarpoq.

Aalisartut marluk qassusersorluni aamma ningittagarsorluni qaleralinniarnermi misilittakkatik saqqummiuppaat. Qassusersornermi ningittagarsornermilu pisat assigiinngissuseqarnerat biologimit aalisartuniillu saqqummiunneqarpoq.

- Qassutit atorlugit angissutsit aalajangersimasut piniarneqarsinnaapput, illuanilli ningittakkat angisuut mikisullu tamaasa assigiimmik pisarisinnaavaat. Tunisassiarineqarsinnaasut, tunisassiarineqarsinnaanngitsullu, Anthon Lindenhann Ilulissani aalisartut piniartullu peqatigiiffianni siulittaasoq oqarpoq.

KNAPK-imit qalerallit pillugit isumasioqatigiisitsinermi, qalerallit aalisartumut, tunissassiortumut inuiaqatigiinnullu aningaasarsiornikkut naleqarnerusumik anguniarneqarnissaa siunertarineqarpoq. Qeqertarsuup tunuani unammilleqatigiittoqarneratigut qalerallip nalinga qaffannikuuvoq. Qalerallit pisarineqartartut alliartulernissaat IAPP-imi siulittaasup qularutiginngilaa.

- Isumaqartuaannarpunga amerliartortut, mikisuaqqat takkussuuttut allissapput, aamma siunissami alliartortunik oqaluttoqalernissaa naatsorsuutigilluinnaqqinnaarpara, Anthon Lindenhann oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.