Qaasuitsup Kommunia iluanaartorsuuvoq
Kalaallit Nunaanni Naatsorsueqqissaartarfiup kisitsisaataasa tamanna takutippaat.
Ukiut tallimat kingulliit Kommunimut Avannaaniittumut isertitat katillugit milliardip kuartianik annertuseriarsimapput. Taamaalilluni siorna aalisakkanik qalerualinnillu koruuninut 570 millioningajannut tunisisoqarsimalluni. Qaffariaat 43 procentingajaasimalluni.
Nunap sinnerani killormut ingerlavoq, tunisineq ukiut tamaasa appariartarluni.
Kommunit sinneri pingasut katillutik siorna 270 millioner koruunit nalinginut tunisisimapput. Kommunini pingasuni 2008-mut naleqqiullugu appariarneq malunnaatilik 21 procentiulluni.
Soqutiginaqutaa uaniippoq; tassa kommunit aalisarnikkut appariartut aamma tassaammata kommunit nalimmassaarinikkut agguaasseqqinnermut ilanngaanneqarnerpaasut. Qeqqata Kommunia aamma Kommuneqarfik Sermersooq isertitatigut kinguariarnerpaaffiupput.
Ilutigitillugu nalimmassaarinikkut agguaasseqqinnermi siunnersuummi kommunit qeqqanittuut tassaapput Qaasuitsumut aningaasaliisussat. Akerlianik Qaasuitsup kommuniata imarmiut tikiussorneqartut nuannaarutigisinnaavai, ingammillu aningaasarpassuit kommuninut nalimmassaarinermeersut.
