Oqartussaaqataanerusinnaaneq paamaarunneqartoq

Maanna Qaasuitsup Kommunianit nassuerutigineqarpoq nunaqarfinni aqutsisut oqartussaassusikippallaartut.

Inuit Ataqatigiinni ataatsimeqaataasut ilaatigut kissaatigaat Qaasuitsup Kommuniani qulaaniit aqutsineq annikillisinneqassasoq, tamatumalu malitsigisaanik aamma inoqarfinnut oqartussaaqataaneq siammarneqassasoq:

- Tassami qulaaninngaanniit aqutsineq taanna ilisimavarput. Aamma nunaqarfinni aqutsisut massakkut oqaasissaqarfeqaratilluunniit inissisimapput. Taamaattumik taanna eqqunnginnerarsinnaanngilara, Enok Sandgreen, Qaasuitsup Kommuniani kikkut tamat oqartussaaqataanerat, kommuuni, attaveqatigiinneq attaveqaatinullu ataatsimiisitaliami siulittaasoq taama oqarpoq.

Nunaqarfiit annerusumik oqartussaaffeqartariaqarput
Aningaasartuutissanut missingersuusiornermi kingullermi nunaqarfiit annerusumik oqartussaaffeqartariaqartut piumasarineqarsimasoq Enok Sandgreenip ilanngullugu eqqaavaa:

- Tassa piffik qimannagu suliap naammassisarnissaa anguniarlugu. Taanna tassa allaffissornermiippoq massakkut. Politikikkut isummertarnerit pioreerput. Kisiannili timitalerniarnera nukingisaarutigineqartariaqassaaq aamma malersukaartuartarparput, Enok Sandgreen oqarpoq.

Kommuunit kattussuutinngikkallarmata Aasiaat Kommunerisimasaanni nunaqarfiit isumaqatigiissuteqarfigalugit nammineq ingerlatsisinneqarsimapput. Taamaalilluni aalajangigassat illoqarfimmi allattoqarfimmut ingerlateqqinngikkaluarlugit nunaqarfinni aalajangiiffigineqartittarlugit:

Isumaqatigiissut timitalerneqanngitsoorpoq
- Kisianni tassa kattunnitta kingorna ajoraluartumik taanna tammarpoq, naak kattunnialernerup pilersinniarneqalernerani isumaqatigiissutitsinnut aamma ilaagaluartoq kommuuneqatigiilersussani nunaqarfiit aamma immikkut isumaqatigiissuteqarfigalugit ingerlatsineq -taanna maani Aasianni atornikuusarput- atorneqassasoq. Kisianni tassa timitalerneqanngitsoorpoq, Enok Sandgreen oqarpoq.

Kisianni tassa nunaqarfiit oqartussaaffeqarnerulernissaat politikkikkut siunniunneqareersimammat allaffissornikkut piviusunngortinneqarnissaa maanna utaqqiinnarneqarpoq:

- Tassa timitalerneqartussaavoq. Allaffissornikkut timitalerneqartariaqarpoq. Politikkikkut isummersornerit naammareerput. Uagut allaffimmiuunnginnatta suliarisinnaanngilarput. Kisianni allaffimmiut kommunalbestyrelsiminngaanniit suliassamik tunineqartut naammassiniartariaqarpaat, Enok Sandgreen oqarpoq.