Nunatta nunanut allamiunut arsaattartui Island Games-ini unammiuaarnissaminnut piareersaleruttorput
Ullumikkummi unammisartuvut Danmarkiliarput, sapaatillu akunnerni tullinnguuttuni arsaattartut Bermudami Island Gameseqartoqannginnerani piareersaatitik kingulliit inississorniartussaassallugit. Arsaattartut Kastrup-imut apuussimaleriarpata Odense-liassapput, tassalu marlunngorpat tulliani Bermuda-liarlutik allannginnerini sungiusaqatigiissallutik.
Allattoq Peter Troelsen, Knud Reimer
juulip 02-at 2013 12:08
Arsaattartut ullaap tungaani tamatigut sungiusaqatigiittassapput, unnukkullu sungiusaatigalugu arsaattartoqatigiit allat unammisassallugit. Unammisassaat tassaapput OB, taakku marloriarlugit unammineqassallutik, aamma Odense KFUM, Fyn-imi serie 1-imi unammisartuusut, kiisalu Svendborgimiut 2. divisionimi arsaattartuni siuttuusut ilaat.
Pingasunngorpat, tassa aqagu arsaattartut Odense-mi takornariartinneqassapput, tamatumalu saniatigut qallunaat nunanut allanut unammisartuini målmand-itoqaasimasup Lars Høegh-ip arsaannermik sungiusartarfia Football Factory aamma pulaarneqassalluni. Borgmester Anker Boye tikilluaqqusisuussaaq, tassalu paasisinnaasatsituut arsaattartut arsaannerinnarmik sammisassaqartinneqarnavianngitsut paasinarsilluni.
