Nunatta Eqqartuussisuuneqarfia: Angut meeqqamik kujannissimasutut eqqartuunneqartoq

Nunatta Eqqartuussisuuneqarfiata angutip maanna 21-nik ukioqartup piffissami pinerluffiusumi niviarsiaqqamik aqqaneq-marlunnik ukiulimmik kujannissimasutut apriilip 19-iani tallimanngornermi eqqartuuppaa. Eqqartuunneqartoq piffissami pinerluffiusumi 16-inik ukioqarpoq.

Kalaallit Nunaanni Politiit tusagassiuutinut nalunaarummi allapput.

Angut Eqqartuussisoqarfik Qaasuitsumi siorna decembarimi pinngitsuutinneqarpoq.

Unnerluussisussaatitaasut eqqartuussut Nunatta Eqqartuussisuuneqarfianit suliarineqaqqitassanngortippaat, tassanngalu eqqartuussutip allanngortinneqarnissaa aalajangerneqarpoq, angullu unnerluussut malillugu eqqartuunneqarluni.

- Meeqqamik 15-iliineqanngitsumik kujanninneq inerteqqutaalluinnarpoq. Meeraq isumaqataasimanersoq aallarniisimanersorluunniit apeqqutaanngilaq.

- Taamaammat Nunatta Eqqartuussisuuneqarfiata eqqartuussiveqarfiup aalajangerneranik allannguinera 21-nillu ukiulimmik eqqartuussinera naammagisimaarpara, unnerluussisussaatitaasoq, Cecilie Stürup Sørensen tusagassiuutinut nalunaarummi oqarpoq.

Angut pinerluuteqaqqikkuni ulluni 40-ni pineqaatissinneqarsimasunut inissiisarfimmiittusanngortinneqarlunilu pinerlineqartumut 20.000 koruuninik akiliuteqartussanngortinneqarpoq.

Eqqartuussivimmi suliaq taamaalilluni maanna naammassivoq.