Angut 23-nik ukiulik pinngitsaaliinerit marluk pillugit ukiut sisamat sinnerlugit pineqaatissinneqartoq
Angut 23-nik ukiulik ukiuni sisamani qaammatinilu arfinilinni pineqaatissinneqarsimasunut inissiisarfimmiissaaq. Tamanna Nunatta Eqqartuussisuuneqarfiata ullumi aalajangerpaa.
Angut Nuummi meeqqat angerlarsimaffiannut 2022-mi maajimi isersimasutut, tassanilu niviarsiaqqamik aqqanilinnik ukiulimmik milutsitsilluni pinngitsaaliisimasutut eqqartuunneqarpoq. Aamma niviarsiaqqamik pinngitsaaliilluni atoqatiginninniarsimasoq, niviarsiaqqalli nillianermini sulisut itertippai taakkulu angut sapilersillugu politiit takkunnissaata tungaanut tigummivaat.
Angut tamatuma saniatigut tigummigallarneqarsimminiitsilluni ineqateqatigisaminik angummik 61-inik ukiulimmik pinngitsaaliilluni milutsitsisimasutut aamma eqqartuunneqarpoq. Angutip angut pinngitsaalillugu aamma atoqatigeriaraluarpaa.
Kalaallit Nunaanni Politiit tusagassiuutinut nalunaarummi allapput.
23-nik ukiulik pissutsinut marlunnut taakkununnga saniatigullu inissiisarfimmiittumut allamut nakuusersimasutut tillissimasutut, unioqqutitsisimasumillu pinngitsaaliisimasutut Eqqartuussisoqarfik Sermersuumit 2023-mi decembarip aallaqqaataani eqqartuunneqarpoq.
Eqqartuussisoqarfiup angut piffissami killiligaanngitsumi paarineqartussanngortippaa.
Pineqaatissiissut suliarineqaqqitassanngortikkaa
Angutip 23-nik ukiullip niviarsiaqqamut aqqanilinnik ukiulimmut tunngatillugu eqqartuussut akeraa, angutilli 61-inik ukiullip pinngitsaalineqarneranut tillinnermullu tunngasut suliarineqaqqitassanngortippai piffissalikkamillu inissiisarfimmiitsitsisarfimmiittussanngortitsisoqarnissaa piumasaralugu.
Naallu Nunatta Eqqartuussisuuneqarfiata angut tillinniarnermi 61-inillu ukiulimmik pinngitsaaliisimasutut eqqartuukkaluarlugu piffissami killiligaanngitsumi paarineqartussanngortinneqarnera allanngortillugu ukiuni sisamani qaammatinilu arfinilinni pineqaatissinneqarsimasunut inissiisarfimmiittussangortippaa.
Eqqartuussiviummi angutip ukiui eqqarsaatigalugit pineqaatissinneqarsimasunut inissiisarfimmiittussanngortitsinani paarineqartussanngortinneqarnissaanut naammattumik tunngavissaqanngissoraa.
Unnerluussisussaatitaasup Gutti Harrysonip nunatta eqqartuussisuuneqarfiata eqqartuussutaa uissuummissutigigaluarlugu aalajangerneq naammagisimaarpaa.
- Angut pinngitsaaleeriarsimasutut eqqartuussaareernikuuvoq, maannalu eqqartuussivimmi nunattalu eqqartuussisuuneqarfianit pinngitsaaleeriarnerni marlunni allani aamma eqqartuunneqarluni. Angut qassinilluunniit ukioqaraluarpat uanga isumaqarnera naapertorlugu inuiaqatigiinni innuttaasunut ulorianarpoq, Gutti Harryson tusagassiuutinut nalunaarummi oqarpoq.
- Ukiunili sisamani qaammatinilu arfinilinni pineqaatissinneqarsimasunut inissiisarfimmiittussanngortitsineq pinerluuteqarnerup taama ittup qanoq ilungersunartigineranik eqqartuussiviup isiginninneranut takussutissiivoq.
Suliamut atatillugu maanna 23-nik ukiulik tarnikkut misissorneqarnikuuvoq, Nakorsallu eqqartuussivimmi siunnersuisartut misissuineq tunngavigalugu oqaaseqaasiornikuupput. Oqaaseqaat tarnikkullu misissorneqarnera pissutigalugit suliap eqqartuussiveqarfimmi nunatta eqqartuussisuuneqarfiani suliap suliarineqarnerani paarineqartussanngortitsisoqarnissaa unnerluussisussaatitaasut piumasaraat.
