Arnârak Patricia Bloch nunatsinni imminut toqunnissamik pinaveersaartitsinermik suliaqartut akornanni ilisimasat siammarterneqarnissaannik suliaqarnini pissutigalugu Nordentoftimik nersornaaserneqarpoq.

Danmarkimi Imminut toqunnissamik pinaveersaartitsineq pillugu Ilinniartitaaneq Ilisimatusarnerlu pillugit peqatigiiffik tusagassiuutinut nalunaarummi allappoq.

Nersornaat danskit peqatigiiffiannit imminut toqunnissamik pinaveersaartitsinermik suliaqartunut 'immikkut ittumik naleqarluartumik suliniuteqartunut' tunniunneqartarpoq.

Arnârak Patricia Bloch Danmarkimi Statens Institut for folkesundhedimi ulluinnarni sulisarpoq, tassanilu nunatsinni innuttaasut peqqissusaannut tunngasunik suliaqartarluni, taassuma nersornaaserneqarnini tulluusimaarutigalugulu tupaallaatigaa.

- Tulluusimaaqaanga. Nunatsinni inuit iliuuseqartut tamarmik sinnerlugit tulluusimaarpunga. Nersornaammi uani misigissuserpassuupput, sammisap imaannanngitsuunera pissutigalugu nersornaaserneqarnera ataqqinartuutippara, taanna oqarpoq.

Oqaloqatigiinneq oqimaassinnaasunik qulequtaqartoq

Peqatigiiffik imminut toqunnissamik pinaveersaartitsinermi ilisimatusarneq ilinniartitaanerlu pillugit suliaqartarmat nersornaat ilisimatusartumut ukiut marlukkaarlugit tunniunneqartarpoq, ukiullu aappaani aalajangersimasumik sammisaqartumut tunniunneqartarluni, peqatigiiffik tusagassiuutinut nalunaarummi allappoq.

Ukioq manna aalajangersimasumik sammisaqartumut nersornaasiisoqarpoq, Arnârak Patricia Blochilu sammisamik tassani suliaqartunut imminut toqunnissamik aarlerinartorsiortumik pineqartullu qanigisaanik qanoq oqaloqatiginnittarnissaat pillugu ukiuni sisamani kingullerni ilinniartitsisimammat taanna nersornaaserneqarpoq.

- Kisianni 'oqaloqatigiinnerup oqimaassinnaasunik qulequtaqartup' ingerlannissaa ajornakusoorpallaanngilaq, pissutigalugu tamanna sunniuteqartoq sukkasuumik takuneqarsinnaallunilu malugineqarsinnaavoq. Tamannalu uanga ilisimasannik nunatsinni sapinngisamik amerlanerpaanut siammarternissaanut suliaqaqqinnissannut kajumissaatigalugulu nukissaqaatigisarpara.

Nersornaatip isumaa annertusoq

Nersornaaserneqartup nersornaaserneqarnini pingaartilluinnarpaa, taassumami suliatigut qaffasissumik suliaqarnermini nersualaarinninnertut tamanna isigaa, nersornaaserneqarnermilu suliap ingerlaannarnissaanut soqutiginninnerulersitsisoqarnissaa neriuutigaa, taamaaliornikkummi inuit imminut toqunnissamik aarlerinartorsiortut paasineqarnissaannut sakkussaqalersut amerlanerulissallutik.

- Eqqaamassavarput inuit ammarnissaannut piffissaq sivisusinnaavoq, kisianni imminut toqunnissamik aarlerinartorsiortup nipaatsumik ilaginissaa aamma ajunngitsuuvoq.

- Qularutiginngilara ilisimasakka inuiaqatigiinni amerlanerpaat suliaqarnerminnut atorsinnaagaat, kisianni inuit kajuminnissaat pingaaruteqarpoq, taamaaliornikkummi tamatta iliuuseqarsinnaavugut, taanna oqarpoq.

- Uanga kisima nersornaaserneqannginnissara pingaaruteqarpoq. Nersornaatip inunnut suleqatigisimasannut pikkorissaaninnilu peqataasimasunut toqqaannartumik oqariartuuteqarnissaa neriuutigaara. Uanga nersornaaserneqarnittulli taakku aamma nersornaaserneqarput, Arnârak Patricia Bloch oqarpoq.

Arnârak Patricia Bloch Livslinjenimit 2019-imi aamma nersornaaserneqarsimasumit nersornaaserneqarnissamut innersuunneqarpoq.