Nora malitseqartitsilerpoq

Nunat Atlantikup Avannaaniittut Suleqatigiiffiat, NORA, Issittumi Siunnersuisooqatigiit Nuummi ataatsimeereernerisa kingorna malitseqartitsilerpoq. Tamanna pissaaq Thorshavnimi isumasioqatigiinnissami juunip qulingiluaanni pisussami.

Allattoq Gedion Storch

maajip 13-at 2011 06:45

Tassani silap pissusaata allanngoriartornerata kingunerisaanik Atlantikup Avannaani imaatigut angallannikkut unammilligassat immikkut ittumik isiginiarneqassapput.

Isumasioqatigiinnermi ilisimatuut nuimanerit arlallit, ilinniagaqarsimasut naalakkersuinermillu suliallit imaatigut angallannerulernermi periarfissat mianersorfissallu immikkut sammissavaat.

Imaatigut angallannikkut aqqutinik avannarpasinnerusunik ammaaneq umiarsuillu takornariartaatit angallannerulernerat aningaasarsiornikkut ineriartornissamut pitsaasumik periarfissaqarpoq. Taamaattorli nunat avannarliit imaatigut sillimaniarnikkut ineriartornissami unammilligassarpassuit isiginngitsuusaarsinnaanngilaat.

Tamanna sumiiffimmi immikkoortortap nukittorsarneqarnissaanik nunanillu tamalaanik suleqateqarnissamik piumasaqaateqarpoq. Taamaattumilluuna Issittumi Siunnersuisooqatigiit imaatigut upalungaarsimanissaaq pillugu isumaqatigiissutaat Tórshavnimi isumasioqatigiinnermi immikkut samminiarneqartoq.

Suleqatigiinneq nutaaq sunik imaqassava? Iluaqutissartai akornutissartaalu suuppat? Imaatigut annaassiniartarnermi upalungaarsimanermi alloriarnerit tulliit suussappat? - Aamma qanoq ililluta sumiiffimmi pineqartumi, aningaasarsiornikkullu sukkasuumik pisoqarfiujartortumi - takornarianik imaatigut angallassinikkut usinillu assartuinikkut upalungaarsimaneq naammagisimaarnartoq qulakkiissavarput?

Tassami Atlantikup Avannaata ilarujussua assersuutigalugu suli immap assinganik amigaateqarfiuvoq. Tamanna qanoq kinguneqassava - qanorlu iliortoqartariaqarpa?

Pinngortitami innarliisinnaanermut nalunaarsuiffik isumasioqatigiinnermi aallaavigineqassaaq, Nunat Avannarliit ministeriisa Siunnersuisooqatigiiffianni ineriartortinneqarsimasoq. Pinngortitami innarliisinnaanermut nalunaarsuiffimmi sammineqarput, avatangiisinik mingutsitsisoqassagaluarpat, ataqatigiissaakkamik iliuuseqarsinnaanissaq. Pilersaarusiami nalilersuinerit isumasioqatigiinnermi saqqummiunneqassapput.

Tamatumalu inatsisartunit ilaasortanit, ministerinit, suliamut ilisimasalinnit ilisimatuunillu nunanit avannarlerneersunit malinnaaffigineqassasoq naatsorsuutigineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.