Nerrivimmi arsaararluni nunatsinni pissartanngorniunnerit poorskimi ingerlanneqassapput
Nuummi Illorsuaq timersortarfimmi unamminerpassuit ingerlanneqassapput, tallimanngornersuarmi aallartissinnarlutik poorskip ulluisa aappaani ajugaaniutivinnernik naggaserneqassapput. timersortarfissuup qullilersorneqarsimanera pitsaasupilussuuvoq, qaamanerlumi nunarsuarmi timersuutit sukkanersaasa ilaannut pingaaruteqartupilussuuvoq.
-Ulluni tullerni sisamani pissartanngorniuttoqarnerani ulapittupilussuussaagut. Pissartanngorniunnerit taamatut ilusiligaapput aamma unammersuarnerit taamatut ingerlannissaat nuannaraarput. Unammisartut inuusunnerit aamma unammisartunik misilittagartuunik malinnaanermikkut pissarsilluarsinnaapput immaqalu nammineq unammilerunik atorsinnaasaminnik pissarsiaqaatigalugu, nerrivimmi arsaarartartut kattuffianni siulittaasoq Emil Kleemann knr.gl-imut oqarpoq.
Nuuk poorskip nalaani timersornikkut pisoqarfiungaatsiartussaavoq, nerrivimmi arsaarartartut kattuffiata tungaaniilli naammagittaalliuutissaqanngillat. Timersornikkut atugassarititaasut pitsaasuupput, aamma unammisartut unnuiffissaannik pissarsinissaq ajornartorsiutaasimanngilaq.
-Kommuni pitsaasumik angusaqarfiulluartumillu oqaloqatigisarparput, aamma unammisartut Nuup avataaneersut pitsaasunik atugassaqartippagut. Unammisartut 150-it missaat poorskip nalaani ullut sisamat ingerlanerini ukioqatigisaminnut unammisussaapput, Emil Kleemann, poorskimi ulapissamaaqisoq oqarpoq.
