Naaja Nathanielsen: Akissut ersernerluppoq
Taama isumaqarpoq Inuit Ataqatigiit sinnerlugit Inatsisartunut ilaasortaq, Naaja Nathanielsen. Taassuma apeqquteqaatigaa, aatsitassanik uranitalinnik niueruteqarsinnaannginnerup atorunnaarsinneqarnerani, sillimaniarnermut tunngasut akisussaaffiit Danmarkip Nunattalu akornanni qanoq aggutaarneqarsimanersut.
- Akissuteqaammi oqaatsinik inuinnaat paasisinnaanngisaannik soorlu nunat tamalaat isumaqatigiissutaannik, inatsisinik oqaatsinuillu suliamut tunngasunik akissuteqaat imaqarpoq.
Naaja Nathanielsen aamma isumaqarpoq, akissuteqaatip paasiuminaannerata kinguneranik inuiaqatigiit oqallinnerannut tamanna akornusiisinnaasoq.
- Maanna Naalakkersuisuusut qinneqqusaarutiminnik oqarluartaarutiminnillu imminnut pisarisuulersutut isikkoqarput, tassalu pissutsit piviusut maanna aatsaat paasineqalerunarlutik. Maannalu avaqqunneqarsinnaajunnaarpoq, urani Nunatsinnit annissuunneqalissagaluarpat Qallunaat Nunaat avaqqullugu tamanna pisinnaanngimmat.
Naaja Nathanielsenip taama isumaqarnera, Aatsitassaqanermut Naalakkersuisoqarfimmit oqaloqatigisatsinnit ilumoornerarneqarpoq.
Tassami aatsitassanut tunngasut Nunatta akisussaaffigilernikuuvaat inatsisinillu tunngaveqalernikuullutik. Taamaalilluni Naalakkersuisut aatsitassanik uranitalinnik niueruteqarsinnaannginnerup atorunnaarsinneqarnernissaannik aalajangiisinnaanngorlutik.
Aatsitassanik uranitalinnik niueruteqarsinnaannginnerup atorunnaarsinneqarnerata soorunami kingunerissavaa, uranimik Nunatta avammut tuniniarsinnaalernera. Tamannalu piviusunngussappat, Nunatta Danmarkillu akornanni suleqatigiissutigisariaqarpoq uranimik annissuinermi nunat tamalaat isumaqatigiissutaat unioqqutinnginnisaaat.