Martha Lund Olsenip paqumigineqartut nipangiusimaneqarunnaarsikkusuppai
- Nipangiusimaneqartarput. Maani Canadami Alaskamilu suli paqumigineqarput oqallisigineqartaratillu. Saqqummiussinerma kingorna arlallit ornippaannga taamatut oqallissaaruteqarnera pitsaanerarlugu. Kingornalumi oqallittoqarnerani tamannarpiaq qitiutinneqarpoq, Martha Lund Olsen oqarpoq.
ICC-p aallartitaasa ”Inuiaqatigiit peqqissut Ilaqutariit ilorrisimaartut” qulequtaralugu ippassaq marlunngornermi oqallimmata Martha Lund Olsen oqalugiartut pingaarnerit ilagivaat.
Martha Lund Olsenip imminut toquttarneq, toqutsinerit, nakuusertarnerit meeqqanillu kinguaassiutitigut atornerluinerit Nunatsinni annertuumik ajornartorsiutigineqarnerat paqumigineqarnerallu oqalugiarnermini isertuutinngilaa.
Suleqatigiissutigisinnaanissaat neriuutigaa
Taanna isumaqarpoq issittormiuusugut paquminartut toqqortiinnarnagit oqallisiginerusariaqarigut.
- Isumaqarpunga neriuutigalulugu tamanna siunissami suleqatigiissutigisinnaassagigut. Kulturimut tunngasoertaa ilaqutariillu ajornartorsiutinik tamakkuninnga aaqqiiniarnissamut pingaaruteqassusaat arlallit eqqaavaat, Martha Lund Olsen oqarpoq.
ICC-p Peqqissutsimut ataatsimiititaliaani ilaasortap, nakorsap Gert Mulvadip, oqallinneq soqutigalugu malittarsaa. Taanna oqarpoq ajornartorsiutinut aaqqiissutissanik nassaarniassagaanni imminut nassaareqqaarnissaq pisariaqartoq.
Ajornartorsiutinut aaqqiissutissarsiornissamut piumassuseqarpoq
- Saqqummiisut assigiissutigisaat tassaavoq ajornartorsiutit nassuerutigineqrmata aammalu aaqqiissutissanut siunnersuuteqartoqarluni, Gert Mulvad oqarpoq.
- Aaqqiissutissammi immini nassaarineqartussaapput, Gert Mulvad oqarpoq, taassumalu qularutiginngilaa inuiaqatigiit nunani issittumiittut ajornartorsiutinut aaqqiissutissanik nassaarniarnissamut piumassuseqartut.
