Kommunit aningaasaqarnerannik naligiissaarineq paasiuminarsarlugu
Kommunit akornanni naligiissaarineq inuit akileraartalermatali, 1975-imili, atorneqalerpoq, qanorli naligiissaarisoqarnissaa allanngorarsimalluni. Inuit akileraartalermata, 1975-imi, paasinarsivoq kommunit isertitaat aningaasartuutaallu naligiinngitsorujussuusut.
Maanna kommunit sisamat aningaasaqarnerat isertitanit assigiinngitsunit tallimaneersuupput: Namminersorlutik Oqartussat ataatsimoortumik tapiissutaat, inuit kommunimut akileraarutaat, inuit akileraarutaasigut naligiissaarutit, ingerlatseqatigiiffiit akileraarutaasigut iluanaarutinillu akileraarutitigut naligiissaarutit, kommuninut ataatsimut akileraarutitigut naligiissaarutit.
Politikerillu naligiissaarinissamut periusissaq isumaqatigiissutiginiarsarinerani, akileraarutinit isertitat assigiinngitsut pingasut aallaavigivaat.
Inuit akileraarutaannik naligiissaarineq
Kommunip ataatsip innuttaasumut ataatsimut isertitat nuna tamakkerlugu agguaqatigiissinneqarnerata 90 procentianit minneruppat, taava kommuni aningaasanik tunineqassaaq. Innuttaasumullu ataatsimut isertitat nuna tamakkerlugu agguaqatigiissinneqarnerata 115 procentianit anneruppat, taava kommuni naligiissaarinermut akiliissaaq.
Kommuneqarfik Sermersuumi innuttaasumut ataatsimut isertitat nuna tamakkerlugu agguaqatigiissinneqarneranit 133,5 procentianiimmat kommuninut allanut tapiissuteqassaaq.
Qeqqata Kommuniani innuttaasumut ataatsimut isertitat nuna tamakkerlugu agguaqatigiissinneqarneranit 93,1 procentianiippoq, taamaattumillu naligiissaarinermut tapiinatillu naligiissaarinermit pissanngillat.
Kommune Kujalleq innuttaasumut ataatsimut isertitat nuna tamakkerlugu agguaqatigiissinneqarneranit 76,7 procentianiippoq, Qaasuitsullu Kommiata innuttaasumut ataatsimut isertitat nuna tamakkerlugu agguaqatigiissinneqarneranit 72,5 procentianiilluni. Taamaattumillu taakku Kommuneqarfik Sermersuumit tapiiffigineqassapput.
Innuttaasut pilersugassat aallaavigalugit naligiissaarineq
Kommuninut ataatsimut akileraarutit aamma ingerlatseqatigiiffiit akileraarutaat iluanaarutinillu akileraarutit ataatsimoortumik tapiissutinik agguaariaaseq naapertorlugu agguaanneqartarput. Tassani kommunit aningaasartuutaat apeqqutaatinneqartarput.
Innuttaasut pilersugassat amerlanerutillugit aningaasanik amerlanernik pisarput. Tassa kommunimi meeqqat inuusuttullu 17-it inorlugit ukiullit qassiunersut, utoqqaallu 65-it sinnerlugit ukiullit qassiunersut aallaavigineqartarput.
Tassani kommunit tamarmik tapiissutinik pisarput. Kanukokap nittartagaani kommunit qanoq annertutigisumik pisarnersoq takusinnaavat.
Paasissutissat Kanukokap nittartagaaneerput: www.kanukoka.gl
