Kommuneqarfik Sermersuumi utoqqaat pisariinnerpaamik sullinneqarput
Ingerlatsivimmi annertusisamik kommunip misissuinerata takutippaa, Kommunini allani innuttaasut amerlassusaannut naleqqiullugu aningaasat utoqqarnut atorneqartut annikinneerarsuusut - kommunimi utoqqalinersiat annertunerpaajugaluartut.
Aningaasartuutit appasinnerinut pissutaatinneqarpoq peqqinnissaqarfimmi paaqqutarinninnermut aningaasartuutit killilersimanissaanut iluatsitsimaneq.
Aningaasat pineqartut tassaapput kommunit peqqinnissaqarfimmut akiliutigisartagaat taakkua napparsimasunik passussinerup inaarsarneranut atorneqartarput , kommunit utoqqaat illuini ingerlaannaq inissaqartitsinnginerini.
Kommuneqarfik Sermersooq Namminersorlutik Oqartussanut kontumut tassunga 2011-mi 10 millioner koruuninik akiliivoq. Ullumikkut aningaasartuutaasartut 2 millioner koruunit missaaniipput.
- Kommunitta qanoq ingerlakkusunneranut tamanna assersuutitsialaavoq, Kommuneqarfik Sermersuumi borgmesteri Asii Chemnitz Narup oqarpoq,
- Tassani aningaasaativut isumatusaarluta atorpavut, taamaammallu nunatsinni sullissineq pitsaanerpaaq, nunatsinni aki appasinnerpaaq atorlugu, neqeroorutigisinnaavarput”, taama oqarpoq Kommuneqarfik Sermersuup borgmesteria, Asii Chemnitz Narup.
Kukkunersiuisunit tikkuarneqarpoq utoqqarnut sullissisuni napparsimanerit appariaateqarfiginerisigut aammalu sulisut ilinniarsimasut amerlanerit sulisoriinnarumallugit iliuuseqarnikkut aningaasanik sipaaruteqartoqarsinnaasoq.
Ilanngullugu eqqaaneqarpoq aningaasat millionit marlussuit sipaarutaasinnaasut, utoqqalinersiat Kommune Kujallermi utoqqalinersiatut annertutigilertuuppata. Taamatulli aaqqiinissaq kommunalbestyrelsip tamarmiusup akerlerigaa, kommuneqarfik Sermersooq tusagassiuutinut nalunaarutaanni allassimavoq.
