Juullilernerani akissarsissapput

Kommunini atorfillit Namminersorlutik Oqartussani atorfilinnit siulliullutik ukiormanna akissarsissapput, tassami Namminersorlutik Oqartussani atorfillit akissarsiassaannik qaammatip naaneranut kinguartitsineq kommunini atorfilinnut atuutinngilaq.

- Ileqqup atuutereersup allanngortinnissaanut pissutissaqanngilavut, Qeqqata Kommuniani borgmesteri Hermann Berthelsen oqarpoq.

Qeqqata Kommunianit nalunaarut naapertorlugu decembarimi akissarsiassat qaqugu tunniunneqassanersut kommunimi sulisut akornanni aamma nalornissutaasimavoq, taamaattumik ukiuni siuliini pisartut malillugit akissarsititsinissaq siunniunneqarluni.

Nunatsinni kommunit sinneri aamma taamatut ilisimatitsipput; Akissarsiassat pisarneq naapertorlugu tunniunneqassapput, tassa juulli sioqqullugu.

Naalakkersuisut upernaaq aalajangerput decembarimi akissarsiassat juullereerpat aatsaat tunniunneqassasut. Akissarsiassat juulli sioqqullugu tunniunneqartarnerat  pisariaqanngitsumik aningaasartuutaasarnerat aalajangernermut tunngavigineqarpoq.

- Ilaqutariit meerartallit juullip tungaanut pilersaarusiorsinnaassuseqarlutillu sipaarsinnaassuseqartut Naalakkersuisut tatigaat. Ilaqutariit meerartallit januaarimut akissarsiassamik juulli sioqqullugu tunniunneqanngikkaluartut juullisiornissamut namminneq akisussaaffeqarsinnaasut tatigaarput, maliina Abelsen qanittukkut ilaatigut taama nalunaarpoq.

Namminersorlutik Oqartussat taamatut aalajangernerat kattuffiit arlallit eqqartuussisulersuussinissamik sioorasaarinerannik kinguneqarpoq.